Монгол Улсын 2023 оны төсвийн тухай, 2024-2025 оны төсвийн төсөөллийн тухай хуульд өөрчлөлт оруулах тухай, Монгол Улсын нэгдсэн төсвийн 2023 оны төсвийн хүрээний мэдэгдэл, Нийгмийн даатгалын сангийн 2023 оны төсвийн тухай, Эрүүл мэндийн даатгалын сангийн 2023 оны төсвийн тухай, Ирээдүйн өв сангийн 2023 оны төсвийн тухай хуулийн төсөл болон эдгээр хуулийн төсөлтэй холбогдуулан боловсруулсан бусад хууль тогтоомжийн төслүүдийг Сангийн сайд Б.Жавхлан  /2022.09.29/ Улсын Их Хурлын дарга Г.Занданшатарт өргөн мэдүүлсэн.

УИХ-ын намрын ээлжит чуулган ирэх даваа гаригт эхэлнэ. Валютын ханш өдрөөр нэмэгдэж, төгрөгийн ханш унасан энэ үед ирэх оны төсөвт ямар бодлого барих нь анхаарал татаж байна. Сангийн сайд Б.Жавхлангийн хэлснээр, Засгийн газар ирэх 2023 оны төсвийн төслийг төрийн хэмнэлтийг хэрэгжүүлж, “Шинэ сэргэлтийн бодлого”-ыг дэмжих, экспортыг нэмэгдүүлэх, макро эдийн засгийг тогтворжуулахад чиглэсэн төсөв гэж буй.

Ирэх онд чинээлэг өрхөд хүүхдийн мөнгө олгохгүй талаар Сангийн сайд мэдэгдсэн бөгөөд технологийн чиглэлийн компаниудыг дэмжих бодлого баримтлах юм.

Мөн Монголбанкнаас өргөн барьсан Мөнгөний бодлогыг чуулганы хэлэлцэх асуудлын жагсаалтад оруулсан байна. Монголбанкны ерөнхийлөгчийн мэдэгдсэнээр, ирэх онд мөнгөний хатуу бодлого баримтлах юм.