“Вагоны жолооч согтуу байсан гэх урьдчилсан мэдээлэл ирсэн”

11 : 33

2022-9-28

“Вагоны жолооч согтуу байсан гэх урьдчилсан мэдээлэл ирсэн”

НЭМЭЛТ:

Зам, тээврийн хөгжлийн сайд С.БЯМБАЦОГТ:

-Урьд шөнө Дорноговь аймгийн Улаанбадрах суманд осол болсон. Зүүнбаян өртөөнөөс Ханги-Мандлын төмөр замын чиглэлд ачаа ачсан "Монголиан транс ложистик" компанийн вагон замаас гарч унасан осол боллоо.

Осол Зүүнбаян өртөөнөөс 75 км зайтай Хулангийн Шанд гэх зөрлөгт уг осол гарсан. Өнгөрсөн шөнө 23:30 цагийн орчимд хөдөлж, 24:00 цагийн орчимд уг осол бүртгэгджээ.

Нийтдээ цуваанд 17 вагон явж байсан. 14 нь төмөр замын ресс төмөр, гурав нь төмөр замын дэр ачсан байна лээ. Ханги-Мандлын төмөр замын бүтээн байгуулалтад хэрэглэх ачаа байсан.

Вагонд гурван хүн зорчиж байсан. Биеийн байдал гайгүй, хүний амь нас эрсдээгүй. Ослын шалтгааныг газар дээр нь тодруулсан. Урьдчилсан байдлаар вагон хурд хэтрүүлсний улмаас замаас гарсан гэсэн дүгнэлт гарсан. Вагоны машинист нь согтуу байсан гэх мэдээлэл ирж байна.

-Энэ асуудлыг цагдаагийн байгууллага шалгаж байгаа. Вагонд байсан хоёр хүний согтолтын зэрэг нэг бүхлээс дээш гарсан. Төмөр зам чанаргүй болсноос гэдэг зүйл яригдаагүй байна. Зүүнбаян-Тавантолгой чиглэлийн төмөр замыг Монголчууд өөрсдөө барьсан. Энэ ондоо багтаагаад улсын комисс хүлээн авна. Одоогоор туршилтын тээвэр хийгдэж байна. Нэмэлт мэдээлэл өгөхөд төмөр замын салбар олон төмөр замтай болсон. Хуучин ганцхан Улаанбаатар төмөр замтай байсан бол, Монголын төмөр зам, Зүүнбаян төмөр зам, Тавантолгой, “Монголын транс ложистик” төмөр зам гэх олон төмөр зам бий болсон. Эдгээр төмөр замыг нэгдсэн удирдлага зохион байгуулалтаар хангах шаардлага гарч буй. Тухайлбал, Монголын төмөр зам төрийн өмчит бодлого зохицуулалтын газар харьяалагддаг. Зүүн баян-Тавантолгой төмөр зам Уул уурхайн яам буюу “Эрдэнэс таван толгой”-н харьялалд байдаг гэх мэт төмөр замын бодлого, нэгдсэн зохион байгуулалт алдагдсанаар сахилга дэг журам, хариуцлагын тогтолцоо алдагджээ. Цаашдаа аюулгүй байдалд анхаарч ажиллах ёстой.

10 : 49

2022-9-28

Тавантолгой-Зүүнбаян чиглэлийн төмөр замд ачааны галт тэрэг осолджээ

Тавантолгой-Зүүнбаян чиглэлийн төмөр замд ачааны галт тэрэг осолджээ. Тодруулбал,энэ сарын 28-ны өглөө Дорноговь аймгийн Хулангийн Шанд гэх газар тус осол бүртгэгдсэн байна.

Осол болсон газар нь Тавантолгой Зүүн-Баян чиглэлийн төмөр замаас 70 км-ийн зайтай аж. Ослын газарт яг одоо тус аймгийн Онцгой байдлын газрын албан хаагчид ажиллаж байна.

Ослын талаар Зам, тээврийн хөгжлийн яамны сайд С.Бямбацогт 11:00 цагт дэлгэрэнгүй мэдээлэл хийхээр болжээ. Дашрамд дурдахад Зүүнбаян-Тавантолгой чиглэлийн төмөр замд өнгөрсөн гуравдугаар сард осол гарсан байдаг. Тодруулбал, Зүүнбаян-Тавантолгой чиглэлийн төмөр замын Цогтцэций өртөө орчимд сэлгээний ажлын үед 33 хоосон чингэлгийг түрж явахад суман шилжүүлэг дээр нэг вагон замаас гарч, хажуу тийш унасан осол гарч байсан юм.