Сүүлийн 10 хоногт Оросоос 5000 хүн иржээ

Хууль зүй, дотоод хэргийн сайд Х.Нямбаатар өнгөрсөн долоо хоногт Монгол Улс Орос улстай 30 хоногийн хугацаатай визгүй зорчдог. Гадаад иргэдийг ямар нэгэн байдлаар хязгаарлах үндэслэл байхгүй. ОХУ-ын ерөнхийлөгч В.Путины зарлигаар цэрэг татлагыг нэмэгдүүлж байгаа юм билээ. Тухайн улсын дотоод хэрэгт Монголын талаас дүн шинжилгээ хийх боломжгүй гэдгийг мэдэгдсэн. Үүнд иргэд болон олон улс судлаачдын зүгээс ч өөр өөрсдийн тайлбарыг хэлж байгаа билээ.

Тухайлбал, судлаачдын үзэж байгаагаар 100 мянга хүртэлх дүрвэгч орж ирвэл сөрөг нөлөөтэй болохыг хэлж буй.

Харин иргэдийн хувьд Оросоос ирж байгаа гадаад иргэд нэмэгдсэнээр гэмт хэрэг, зөрчлийн тоо ч өсөх төлөвтэй байгаа талаар сэтгэгдлээ бичиж байна. Ямартай ч одоогоор үүнд албан ёсны статистик мэдээ гаргаагүй болохыг холбогдох албаны хүмүүс мэдээллээ.

Есдүгээр сарын 15-наас хойш Хиагт-Алтанбулаг боомтоор ОХУ-ын 5001 иргэн Монгол Улсад нэвтэрсэн байна.

Хоногийн статистикаас харвал:

Есдүгээр сарын 15-нд 179 хүн
16-нд 220 хүн
17-нд 260 хүн
18-нд 179 хүн
19-нд 169 хүн
20-нд 153 хүн
21-нд 229 хүн
22-нд 830 хүн
23-нд 867 хүн
24-нд 931 хүн
25-нд 984 хүн Монгол Улсын хилээр нэвтэрчээ.

ОХУ-ын Ерөнхийлөгч Путин өнгөрсөн лхагва гарагт /2022.09.21/ хэсэгчилсэн дайчилгаа явуулна хэмээн мэдэгдсэн. Үүнээс хойш тус улсаас гарах иргэдийн тоо огцом нэмэгдэж, визгүй зорчдог хөрш зэргэлдээ Монгол, Казахстан, Гүрж зэрэг улсууд руу олноор гарах болсон юм. Үүнтэй холбоотойгоор гадаадын иргэдийн зорчих хугацаанд хязгаарлалт тогтоох эсэхийг хүмүүс сонирхож буй.