Нийслэлийн Сонгинохайрхан дүүргийн жижиг дунд үйлдвэр, үйлчилгээ эрхлэгчдийн бүтээгдэхүүнийг олон нийтэд таниулах, төр хувийн хэвшлийн хамтын ажиллагааг сайжруулах зорилго бүхий “Сонгинохайрхан гоёл-2022” өдөрлөгийг /2022.09.25/ төв талбайд зохион байгууллаа. Х.Нямбаатар сангийн санаачилгаар зохион байгуулж буй тус арга хэмжээнд Сонгинохайрхан дүүргийн 43 хорооны 2150 иргэн долоон нэр төрлийн бүтээгдэхүүн, үйлчилгээгээ танилцуулан оролцсон юм.

Тухайлбал, НӨШБҮХ нь 2012 онд 47 үйлдвэрлэл эрхлэгч нарын нэгдлээр байгуулагдаж байсан бол одоо 2000 гаруй гишүүнтэй бөгөөд 2800 гаруй өрхийг бойжуулан бизнес инкубацийн үйлчилгээ үзүүлдэг. Өдөрлөгийн үеэр Сонгинохайрхан дүүргийн Засаг дарга Н.Алтаншагай “Сонгинохайрхан дүүргийн ЗДТГ-ын удирдлагуудын зүгээс дүүргийнхээ үйлдвэрлэл эрхлэгчдийг дэмжих үе шаттай арга хэмжээнүүдийг зохион байгуулдаг бөгөөд Нийслэлийн ЖДҮҮДТ-тэй хамтран тоног төхөөрөмжийн дэмжлэг үзүүлж, хөнгөлөлттэй зээлд хамруулах зэргээр хамтран ажиллаж байна. Мөн хамтын ажиллагааны гэрээтэй гадны улс орнуудад бараа, бүтээгдэхүүн борлуулах тал дээр анхаарч дэмжлэг үзүүлэн ажиллаж байгаа” талаар хэллээ.

Тус арга хэмжээ Сонгинохайрхан дүүргийн бүтээгдэхүүн, үйлчилгээ эрхлэгчид, хөгжлийн төвүүдийн үйл ажиллагааг иргэдэд сурталчлан таниулах хөтөлбөрийн хүрээнд үргэлжлэв.