Иранд 22 настай бүсгүйн үхлээс болж эсэргүүцлийн жагсаал эхэлмэгц интернэт сүлжээг тасалсан. Бүтэн долоо хоног гадаад ертөнцөөс тусгаарлагдсан ч иранчууд тэмцлээ үргэлжлүүлсээр байгаа юм.

Тэгвэл АНУ-ын сангийн яамнаас технологийн компаниудыг Ираны интернэтийг сэргээх программ хангамжийг ажлуулахыг зөвшөөрчээ. Энэ дагуу тэрбумтан Элон Маск хиймэл дагуулын интернэтийн "Starlink"сүлжээгээ Иранд оруулахаар ажиллаж эхэлснээ мэдэгдэв. Гэхдээ техникийн талаас харвал "Starlink" сүлжээг Иранд оруулахын тулд олон тооны газрын станц хэрэгтэй. Эдгээр станцыг Иранд байршуулж эхэлбэл улс төрийн зөрчил үүсгэж болзошгүй гэж ажиглагчид үзэж байна. Гэсэн ч  техникийн саадыг үл харгалзан "Starlink"  интернэт сүлжээг оруулж чадна гэж иранчууд найдаж буйгаа илэрхийлжээ.

Иранд интернэт сүлжээ тасарснаас жагсаалын нөхцөл байдал, амь үрэгдэж, гэмтэж бэртсэн жагсагчдын талаарх мэдээллийг олон улс авах боломжийг хязгаарласан юм.

Хүний эрхийн байгууллагуудын мэдээлснээр жагсагчид болон цагдаа нарын хооронд мөргөлдөөн гарснаас 50 хүн нас бараад байгаа аж.