"The Hu" хамтлаг "AIM Awards-2022"-т нэр дэвшжээ

Монголын хүннү рок "The Hu" хамтлаг есдүгээр сарын 28-нд Лондон хотноо болох "AIM Awards-2022"-т нэр дэвшсэн байна. Тэд одоо Америкт аялан тоглолт хийж байгаа бөгөөд аравдугаар сарын 4-нд дуусах аж.

Үүний дараагаар Европ дахь аялан тоглолтоо аравдугаар сарын 26-наас эхлүүлэхээр төлөвлөжээ. Хамтлагийн тоглолтын хуваарь энэ оныг дуустал гарсан байна.

Тэд энэ сард "Rumble of Thunder" нэртэй хоёр дахь цомгоо худалдаанд гаргаад буй. Шинэ цомогт "Учиртай гурав", "Шихихутаг", "Татар дайчин", "Хар аянга", "Байгаль эх" гэх мэт нийт 13 дуу багтжээ.

Хамтлагийн залуус тоглолтоо Норвеги улсад аравдугаар сарын 26-нд эхэлж, арванхоёрдугаар сарын 9-нд Английн Лондон хотноо болсноор өндөрлөх аж. Хамтлаг 2019, 2021 онуудад Европ, Хойд Америкийн орнуудаар аялан тоглосон. Түүнчлэн өнгөрсөн дөрөвдүгээр сард "Coachella" хөгжмийн наадамд оролцсон.

"The Hu" хамтлаг 2016 онд байгуулагдсанаасаа хойш богино хугацаанд олон улсад танигдаж чадсан Монголын амжилттай хамтлаг. Хамтлагийн гаргасан дуу бүхэн "Youtube"-д өндөр хандалт авч, дэлхийд эх орныхоо нэрийг цуурайтуулж явна.