Энэ Ням гаригт автомашингүй өдөр болно гэж Нийслэлийн Засаг даргын орлогч З.Төмөртөмөө мэдээлэв. Тэрбээр “Цар тахлын улмаас хоёр жил автомашингүй өдрийг зохион байгуулж чадсангүй. Энэ жил автомашингүй өдрийг өргөн цар хүрээнд энэ Ням гаригт буюу есдүгээр сарын 25-нд зохион байгуулна. Дэлхийн улс орнууд жил бүр есдүгээр сарын 22-ны өдөр автомашингүй өдрийг зохион байгуулдаг уламжлалтай. Бидний хувьд амралтын өдрийг сонгосон. Автомашины хэрэглээг нэг өдөр ч гэсэн хязгаарлаж нийтийн тээврийг сурталчлах  зорилготой. Энэ жил спортын олон тэмцээн зохион байгуулна” гэлээ.

Түүний хэлснээр автомашингүй өдрөөр 3X3 сагсан бөмбөг, шатрын тэмцээн болон спортын төрлүүдийг үзүүлэх тоглолтууд болох юм байна. Мөн хүүхдүүдэд зориулсан  гар зургийн уралдаан, жүжигчилсэн тоглолт, үлгэр ярья насанд хүрэгчдэд зориулсан тэмцээн, жүжиг зэрэг олон арга хэмжээг зохион байгуулахаар төлөвлөжээ. Хүн бүр Сүхбаатарын талбайд ирж амжихгүй тохиолдолд ойролцоох дүүргүүдэд автомашингүй өдрийг тэмдэглэх боломжийг бүрдүүлж байгаагаараа онцлог аж. Мөн автомашингүй өдрийн орой нь сонгодог хөгжмийн тоглолт болох юм байна.