“Гадаадаас эрдэм өвөрлөж ирэхийг үнэхээр их хүсч байна” | News.MN

“Гадаадаас эрдэм өвөрлөж ирэхийг үнэхээр их хүсч байна”

“Гадаадаас эрдэм өвөрлөж ирэхийг үнэхээр их хүсч байна”

“Хээрийн галуу нисэн үл хүрэх газраас хүний хүү эрдмийг өвөрлөн ирнэ”. Их зохиолч Д.Нацагдоржийн  энэ шүлэгт монголчууд дуртай. Тэд нэг л өглөө хээрийн галуу нисэх үл хүрэх газрыг зорьж, эрдэм өвөрлөхөөр явж магадгүй. Тэд гэдэг маань ШУТИС-ийн оюутан М.Ариунболд, МУИС-ийн оюутан Д.Оюумаа нар.

М.Ариунболд өнгөрсөн хавар нийслэлийн 104 дүгээр сургуулийг төгсөж, энэ намар ШУТИС-ийн Хиймэл оюун ухааны ангид элсчээ. Тэрбээр Японд мэдээлэл технологийн чиглэлээр суралцахыг мөрөөддөг. Харин Д.Оюумаа хотод оюутан болж ирээд удаагүй байгаа. Сүхбаатар аймгийн Баяндэлгэр сумын ерөнхий боловсролын сургуулиа төгсөөд МУИС-ийн Бизнесийн салбар сургуульд  элсэн орсон.

Монгол Улсын Ерөнхийлөгч У.Хүрэлсүх хүүхэд, залуусын боловсролыг дэмжиж, дэлхийн шилдэг боловсролтой монгол хүн бэлтгэх зорилгоор “Ерөнхийлөгчийн илгээлт-2100” хөтөлбөрийг өнгөрсөн оноос хэрэгжүүлж эхэлсэн билээ. Ингээд тэдний баяр хөөрөөс хуваалцсанаа хүргэе.

“Илгээлтийн эзэд 2100” тэтгэлэгт хөтөлбөрт тэнцсэнээ яаж мэдсэн бэ. Ерөнхийлөгчийн илгээлтийг аваад хамгийн түрүүнд хэнтэй баяраа хуваалцав?

М.Ариунболд: Хичээлээ хийгээд сууж байтал найзаас маань чат ирсэн. Ерөнхийлөгчийн тэтгэлэгт тэнцчихсэн байна, баяр хүргэе гэхээр нь эхэндээ  гайхаад, итгэхгүй байсан. Тэгээд тэтгэлэгт хамрагдсан хүүхдүүдийн жагсаалт руу орж, өөрийн нэрээ харсан чинь баярлаж, гайхах зэрэгцээд маш их догдолсон. Тэтгэлэгт тэнцсэн гэх мэдээг сонсох үед гэрийнхэн маань хамт байгаагүй, ажилдаа явчихсан байсан. Тэгтэл аав, ээж хоёр өөр хүмүүсээс намайг тэтгэлэгт хамрагдсаныг бас мэдсэн байсан. Гэр бүл, найз нөхөд, ахан дүүс гээд бүгд  маш их баяртайгаар хүлээн авсан.

Д.Оюумаа: Тэтгэлэгт тэнцсэн гэдгээ эгчээсээ сонссон. Анх сонсоод маш их баярласан. Ар гэрийнхэн болон хамаатнууддаа дуулгахад тэд маш гоёор хүлээж авсан. Бүгд энэ тухай сонсоод надад баяр хүргэхэд өөрөөрөө бахархах мэдрэмж төрсөн.

Ерөнхийлөгчийн тэтгэлгийн талаар өмнө нь сонсож байсан уу?

М.Ариунболд: Зуны амралтаараа кофе шофт ажиллаж байхдаа энэ тэтгэлэгт хамрагдсан хүнээс Ерөнхийлөгчийн тэтгэлгийн талаар мэдсэн. Гэхдээ энэ тэтгэлэгт хамрагдаж чадна гэж огт бодож байгаагүй. Одоо ингээд тэтгэлэг авч чадсандаа маш их баярлаж байгаа.

Д.Оюумаа: Өнгөрсөн жил Ерөнхийлөгчийн тэтгэлэгт хамрагдсан хүүхэд манай сургуулийнх байсан болохоор тэтгэлгийн талаар мэдээлэлтэй байсан. Тиймээс энэ тэтгэлгийг авчих юмсан гэж хүсэж байсан.

Чиний хувьд хаашаа явж суралцахыг хүсэж байна вэ?

М.Ариунболд: Япон улсад мэдээллийн технологийн чиглэлээр суралцах хүсэлтэй байгаа. Анх аравдугаар ангид хөл хорионд байхдаа компьютерийн чиглэлээр мэргэжил эзэмших юм байна гэж шийдсэн. Тийм болохоор ШУТИС-ийн программ хангамжийн ангид элсэх сонирхолтой байлаа. Харамсалтай нь, программ хангамжийн ангид орж чадаагүй. Харин хиймэл оюун ухааны ангид орсон. Энэ ангийг сонгосноороо программ хангамж болон хиймэл оюун ухааны хичээлээ хамтад нь үзэх боломжтой болсон. Ингээд нэг сумаар хоёр туулай буудсан шийдвэр болсон.

Д.Оюумаа: Энэ жилийн илгээлтийн эздээр тодорсон хүүхдүүд МУИС болон ШУТИС-д эхний жилдээ суралцана. Ирэх жилээс гадаад явах тэтгэлэгтээ тэнцвэл гадаадын 10 улсын их дээд сургуулиас сонголтоо хийх юм билээ. Би Герман улсад бизнесийн чиглэлээр суралцахыг хүсэж байгаа. Гадаадад олж авсан мэдлэгээрээ Монгол Улсынхаа хөгжил дэвшилд хувь нэмрээ оруулна гэж мөрөөддөг.

-Гадагшаа явж суралцах нэг шалгуур нь хэлний мэдлэг маш сайн байх ёстой. Гадаад хэл хэр үзэж байна?

М.Ариунболд: Англи хэлээ хувиараа өөрөө сурсан. Одоо улам гүнзгийрүүлэн үзнэ.

Д.Оюумаа: Гадаад хэлээ түлхүү сурах бодолтой байна.

-Энэхүү тэтгэлгийн талаар ямар бодолтой байна вэ?

М.Ариунболд: Олон залуусыг мөрөөдлийг биелүүлэхэд туслаж байгаа Ерөнхийлөгчид баярлалаа. Эзэн хичээвэл заяа хичээнэ гэдэг. Хичээж байгаад тэтгэлэг аваад гадагшаа явахыг үнээр хүсэж байна.

Д.Оюумаа: Монгол залуус гадаадад сурах мөрөөдөлтэй ч санхүүгийн боломж хомс. Ямар ч байсан эхнийн “шалгуурт”-аа тэнцлээ. Одоо тэтгэлэг авах нь миний хичээл зүтгэлээс л хамаарах байх.

Б.УНДРАМ

Энэ мэдээнд өгөх таны сэтгэгдэл?
18
ЗөвЗөв
2
ХахаХаха
0
ХөөрхөнХөөрхөн
0
ГайхмаарГайхмаар
0
ХарамсалтайХарамсалтай
0
ТэнэглэлТэнэглэл
0
БурууБуруу
Баярлалаа!

10 сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2022-09-22 103.80.210.183

шалгарсан хүүхдүүд дандаа татаасаар баячуудын хүүхэд шалгарсан гээд мэдээлээд байна. энэ ичмэр үнэхээр ядуу юу? баяны шуналын үргэлжлэл үү?

Avatar

Зочин 2022-09-22 192.82.90.83

Ерөнхий биш инженерийн нарийн мэргэжлээр л гадаадад сургамаар байх юм.

Avatar

Зочин 2022-09-22 203.91.115.56

Хээрийн галуу… гэдэг чинь Нацагдоржийн санаа биш Күнзийн сургаалаас ишлэсэн хэрэг. Заавал гадаад явах хэрэггүй. Монголын боловсрол хог боловч хог дээрээс бас хэрэгтэй зүйлээ олж болно. Хамгийн гол нь ажлын байран дээр журмын бус шалгаруулалт хэрэгждэг. Танил тал, ар өврийн хаалга буюу шулуухан хэлэхэд авилга. Тэгээд хувийн салбарт өрсөлдөгчдийн дийлэнх нь хулгайчид байдаг. Төсвөөс хусна. Шударга өрсөлдөнө гэж байхгүй. Гачлан нь энэ л байна. Ийм байдлаас болж аливаа хүн зорилготойгоор хөдөлмөр

Avatar

Зочин 2022-09-22 203.91.115.56

эрхлэх хүсэл нь унтарч шантардаг. Идэвхтэй байсан хүмүүс ийм нийгэмд удахаараа люмпэн хэвшилд шилждэг.

Avatar

лам 2022-09-22 139.5.217.119

дотооддоо монгол хэлээр сурч чаддаггүй оюутнууд гадаадад очоод л сураад гэдэг үлгэрээ зогсоох хэрэгтэй

Avatar

Зочин 2022-09-22 103.9.90.100

Японд ia чиглэлээр сурч төгсвөл монголд ажиллах ямар ч боломжгүй. Япон л бол япон. Японоос өөр газарт ажиллах боломжгүйгээр сургадаг. Англи хэлээр биш японоор төгсдөг. Дараа нь монголд, баруун, Америк канадад гэхээр хэл байхгүй, хөрвүүлэх боломжгүй сурсан учраас ажиллаж чаддаггүй. Сайн судлах л хэрэгтэй

Avatar

Зочин 2022-09-22 126.33.114.164

Уучлаарай энэ талаараа дэлгэрүүлж бичих боломж бна уу? Яагаад япон хиймэл оюун ухаанаар төгсчихвөл өөр улсад ажиллах боломжгүй болдог талаар?

Avatar

Зочин 2022-09-22 66.181.161.55

Уучлаарай…монгол хүн сурвал бүх салбарт мэдлэгтэй болно.япон хүн ганцхан салбарт…

Avatar

Зочин 2022-09-22 103.80.210.183

тэгээд оюунтүлхүүр нэг их гавихгүй байгаад байга юм байна даа. оюунтүлхүүр дэмий л шалгарч японд геша болж иржээ

Avatar

Иргэн 2022-09-22 66.181.191.178

Монголчууд арван жилийн сургуулиудад мөн их сургуулиудад сурч байхдаа шалгалтуудын асуултуудыг урьдчилаад авчихдаг тул өнөөгийн боловсон хүчин хэтэрхий мангуу юм. Яаж асуултуудыг урьдчилаад авдгийг хүн бүр мэддэг.

NewsMN Гар утасны хувилбар Татах
NEWS.mn

Мэдээллийн эх сурвалж