Сайн мэдээ дуулгахад “Улаанбаатар төмөр зам” хувь нийлүүлсэн нийгэмлэгийн ачаа эргэлт өнгөрсөн долдугаар сард эрс өсчээ. Тодруулбал, дээрх сард төмөр замаар нэг сая 72 мянган тонн ачаа тээвэрлэсэн юм байна. Энэ амжилтаа тус нийгэмлэгийнхэн наймдугаар сард бататган, нэг сая 200 мянгад хүргэх зорилт тавьжээ.

Төмөр замын ачаа эргэлт ийн өссөнийг албаны хүн Монгол Улсын эдийн засаг сэргэсний нэг илрэл гэж тайлбарлав. Мөн энэ нь уул уурхай, барилгын салбар хямралаас гарч, үйлдвэрлэл эрчимжсэнийг харуулна гэж хэллээ. Түүнчлэн “Улаанбаатар төмөр зам” хувь нийлүүлсэн нийгэмлэг нь ачаа тээвэрлэлтээ зөв зохион байгуулж, ажиллаж ямар нэг хүндрэл бэрхшээлгүйгээр ачааг нь хүлээн авагчид нь хүргэж байгаатай холбоотой гэв.

Г.Дарь