“Шинэ үе урлаг” нийгэмлэг жил бүр уламжлал болгон зохиодог “NEW ART” үзэсгэлэнгийнхээ нээлтийг Занабазарын нэрэмжит дүрслэх урлагийн музейд энэ сарын 25-нд хийх гэж байна. Тав дахь удаагаа болох энэхүү шинэлэг хэлбэрийн үзэсгэлэнд 18 уран бүтээлчийн уран зураг, видео арт, холимог техник, арьсан урлаг, зээгт наамал зэрэг төрлүүдээс бүтсэн 40 гаруй бүтээлийг, тав хоногийн турш үзэгчдийн хүртээл болох аж.

Дашрамд сануулахад “Шинэ үе урлаг” нийгэмлэг нь таван жилийн өмнө зураач Л.Энхбатын санаачлагаар  зургаан хүний бүрэлдэхүүнтэй байгуулагдаж байжээ. Тэд үйл ажиллагаагаа Монголын орчин үеийн урлагийг хөгжүүлэх, уран бүтээлчдийг гадаад, дотоодын үзэсгэлэнд оролцуулах, мөн бусад орны уран бүтээлчидтэй хамтран ажиллах болон дүрслэх урлагийн салбарт хүч түрэн гарч ирж буй залуу уран бүтээлчийг олон нийтэд таниулах, бүтээлийг нь сурталчлахын зэрэгцээ орчин үеийн урлагийн бүтээлээр дамжуулан олон нийтийн урлагийн боловсролыг дээшлүүлэх, залуу уран бүтээлчдийг нэгтгэн, нэгэн хүч болгон эх орныхоо хөгжилд тодорхой хэмжээний хувь нэмэр оруулахад чиглүүлж иржээ.

Одоо тус нийгэмлэгт урлагийн ертөнцөд сэтгэл зүрхээ өгсөн 60 гаруй залуу уран бүтээлч нэгдэж,  уран зураг, зураасан зураг, уран баримал, торгон зураг, арьсан урлаг, видео арт, компьютер график, инстолляци, гобелен зэрэг дүрслэх урлагийн олон төрлүүдээр уран бүтээл хийн ажиллаж байгаа аж.

Г.Дарь