Украины  сөрөг довтолгоо  ахиц дэвшил авчирснаар Оросын арми зүүн нутгийн гол хотуудаас ухарсан байна. Украины албаныхны мэдээлснээр, цэргүүд өнгөрсөн Бямба гаригт Оросын армийн зүүн бүсийн чухал хангамжийн төв болох Купянск хотод нэвтэрчээ. Үүний дараа Оросын Батлан ​​хамгаалах яам цэргүүдээ "дахин бүлэглэх" боломжийг олгохын тулд ойролцоох Изюм хотоос ухарсан гэж мэдэгдэв. Мөн тус яам Донецкийн фронт дахь "хүчин чармайлтыг бэхжүүлэх" зорилгоор гурав дахь чухал хот болох Балаклиягаас цэргээ татан гаргасныг баталжээ.

Изюм нь  оросуудын  гол зангилаа газар байсан бөгөөд түрэмгийллийн эхний үед тус бүс нутагт ширүүн тулалдаан өрнөж  байсан. “Изюм-Балаклия” бүлэглэлийн цэргийг татан буулгаж, зохион байгуулалттайгаар Бүгд Найрамдах Донецк Ард Улсын нутаг дэвсгэрт шилжүүлэх ажиллагаа гурван өдрийн турш үргэлжилсэн гэж Оросын мэдэгдэлд дурджээ.

Украины арми Оросын эзэлсэн газар нутгийг эргүүлэн авч чадна гэсэн дохиог өгч байгаа бөгөөд тус улс барууны орнуудаас цэргийн дэмжлэг хүссээр байна.

Үүний дараахан Харьков мужийн Оросын мэдэлд байдаг хэсгийн ахлах администратор "амь насыг аврахын тулд оршин суугчдыг нь Орос руу нүүлгэн шилжүүлэхийг зөвлөсөн" гэж төрийн мэдлийн ТАСС агентлаг мэдээлэв. Мөн хөрш зэргэлдээх ОХУ-ын Белгород мужийн захирагч ярихдаа, хилээр гарахаар оочерлож буй хүмүүст явуулын хоол, халаалт, эмнэлгийн тусламж үзүүлэх боломжтой гэжээ. Оросууд  ложистикийн хоёр гол зангилаа болох Изюм, Купянск гэсэн төмөр замын хотуудыг алдаад байна.

Эх сурвалж: BBC