АНУ-ын Төв банкны дарга үнийн өсөлттэй тэмцэхийн тулд бодлогын хүүгээ үргэлжлүүлэн нэмэгдүүлнэ гэж мэдэгдсэний дараа Азийн орнуудын хувьцааны ханш уналаа.

Жером Пауэлл Холбооны нөөцийн сангийн бодлого нь "айл өрх, аж ахуйн нэгжүүдэд бага зэрэг хүндрэл учруулах болно" гэж анхааруулав.

Зээлийн хүү өндөр байгаа нь иргэд болон компанийн хувьд зээлийг илүү үнэтэй болгож, улмаар эдийн засгийн өсөлт, инфляцыг удаашруулж болзошгүй юм.

Японы "Nikkei 225" индекс Даваа гаригт Токиод 2.7 хувиар буурчээ. Ази-Номхон далайн бусад бүс нутагт Өмнөд Солонгосын "Kospi" болон Австралийн "ASX 200" хоёр орчим хувиар буурсан бол Хонг Конг дахь "Hang Seng" 0.8 хувиар буурсан байна. Үүнээс өмнө Нью-Йоркийн хувьцааны үндсэн индексүүд Баасан гаригт тус бүр 3 хувиар унасан юм.

Хятадын эдийн засаг удааширч байгаад хөрөнгө оруулагчид санаа зовж байна гэж "Hang Seng Bank China"-гийн ахлах эдийн засагч Дан Ван "ВВС"-д ярьжээ.

"Хятадын эдийн засгийн хэтийн төлөв Covid-19-ийн хяналтыг удаан үргэлжилсний улмаас улам дордлоо. Энэ нь бодлогын хүүг цаашид бууруулах шаардлагатай гэсэн үг. Хятадад бодлогын хүүг цаашид бууруулахгүйгээр дотоодын эрэлт хэтэрхий сул байна" гэж тэрбээр тайлбарлав. Энэ оны хоёрдугаар улиралд эдийн засгийн өсөлт огцом удааширсны дараа Хятадын төв банк энэ сарын эхээр зээлийн хүүгээ бууруулсан.

Сычуань мужид эрчим хүчний хомсдол үүсч, Хятадын автомашин, ухаалаг гар утасны томоохон үйлдвэрлэгчид ч уналтанд нэрвэгдлээ.

Өнгөрсөн амралтын өдрүүдэд Хятадын аж үйлдвэрийн пүүсүүдийн ашиг нэгдүгээр сараас долдугаар сар хүртэл өмнөх оны мөн үетэй харьцуулахад 1.1 хувиар буурчээ. Мөн тус улсын үл хөдлөх хөрөнгийн зах зээлийн хямрал нь эдийн засгаа өсгөх засгийн газрын хүчин чармайлтад томоохон сорилт болж байна.

Эх сурвалж: BBC