Хойд Солонгосын эрх баригчид Covid-19 цар тахлын халдварыг дарснаа зарласан ч халуурах шинж тэмдгээр өвчилсөн хүмүүс гарсаар байна. Тэгвэл Хятадтай хил залгаа бүс нутагт өндөр халуурч, өвдсөн хүмүүс Covid-19 биш томуугаар өвчилсөн гэж Пёньян мэдээлжээ.

Үүнээс өмнө Хойд Солонгосын Янган мужид дөрвөн хүн халуурч өвдсөн нь Covid-19 байх магадлалтай гэж үзэн бүс нутагт хөл хорио тогтоосон аж. Гэвч шинжилгээний хариугаар эдгээр хүмүүс цар тахал биш томуугаар өвчилсөн нь тогтоогдсон гэж Хойд Солонгосын төвийн мэдээллийн "KCNA" агентлагийн мэдээлэв.

Хойд Солонгост Covid-19 халдвар гарсны дараа оношлуур хангалтгүй байсан учир халуурах шинж тэмдэгтэй хүмүүсийг бүгдийг нь тусгаарлан эмчилж байв. Улмаар тус улсын 26 сая хүн амын 4.8 сая орчимд нь "халуурах" шинж тэмдэг илэрсэн гэж бүртгэжээ.

Хойд Солонгос нь наймдугаар сарын 10-наас хойш цар тахлын халдвар нэмж бүртгэгдээгүй гэж мэлзэж буй.