Япон улс Хятадын эсрэг довтолгооны чадавхиа нэмэгдүүлэхийн тулд алсын тусгалтай далавчит пуужингууд байрлуулахаар хэлэлцэж байна. Уг пуужингуудыг ихэвчлэн өмнөд Нансей арлуудын эргэн тойронд байрлуулснаар Хойд Солонгос болон Хятадын эрэг орчмын бүсэд хүрэх боломжтой гэж “Yomiuri” сонинд мэдээлжээ. Энэхүү алсын тусгалын пуужингууд нь 500-5000 км тусгалтай.

Япон улс дайнаас татгалзсан бөгөөд цэргийн хүчээ зөвхөн өөрийгөө хамгаалах зорилгоор ашиглана гэж тайлбарладаг. Түүнчлэн гадаадын нутаг дэвсгэр дэх байг онох боломжтой алсын тусгалын пуужин байрлуулахаас татгалзсаар ирсэн. Гэсэн хэдий ч сүүлийн жилүүдэд цэргийн зардлаа нэмэгдүүлж, илүү хатуу стратеги боловсруулах болсон.

Хятад улс далайд суурилсан 300, хуурай газарт суурилсан 1900 орчим пуужинтай. Япон улс энэхүү зөрүүтэй байдлыг арилгахаар эрмэлзэж буй гэж “Yomiuri” сонинд нийтэлсэн байна. Үүнээс гадна япончууд Хятад, Хойд Солонгосын болзошгүй аюулын эсрэг пуужингийн хүчин чадлаа нэмэгдүүлэх хөтөлбөр хэрэгжүүлж эхэлсэн.

Дашрамд дурдахад, АНУ-ын Төлөөлөгчдийн танхимын дарга Нэнси Пелоси Тайваньд айлчилсантай холбоотойгоор Хятад улс галын шууд сургуулилалт хийсэн. Сургуулилалтын үеэр Японы эдийн засгийн онцгой бүсэд пуужин харвасан тохиолдол гарсан.

Япон улс мөн 1000 гаруй км зайд байгаа байг онох дотоодод үйлдвэрлэсэн 12 төрлийн газар-усны ангиллын пуужингаа сайжруулж, өргөтгөхөөр төлөвлөж байна.

Эх сурвалж: SCMP, EURONEWS