Шинэ хичээлийн жилийн нээлт ойртож, нийслэлийн хөл хөдөлгөөн идэвхижлээ. Ажил, амралтаар хө­дөөг зоригсод хүлгийн жолоог их хотын зүг хандуулж, оюутан су­рагчид эрдмийн өргөөгөө зорихоор айсуй. Энэ жил их, дээд сургуулиуд нэгдсэн учраас оюутнуудын олонхи нь нийслэлд цуглаж байгаагаар онцлогтой. Хичээлийн шинэ жилийн баяр баясгалантай зэрэгцэн сур­галтын төлбөр, хичээлийн хэрэгсэл, хувцасны өртөг гээд эдийн засгийн дарамтууд иргэдийг бухимдуулсан хэвээр. Зарим нэг нь “Эх орны хишиг”-ийн 10 мянган төгрөг гори­лон арил­жааны банкны босго элээж байгаагаа учирлана. Их, дээд сургуулиуд инфляцитай уралдан сургалтын төлбөрөө нэж­гээд хувиар нэмж байгаагаа зар­лав. Сургууль, цэцэрлэгийн дуусаагүй засвар, нө­хөж, засаагүй зам, хэвлэлтэд ороогүй сурах би­чиг, үнэ хөөрөгдсөн бараа бү­тээгдэхүүн жилийн жилд сэдэв бол­дог уламжлалаа дагав. Гэхдээ олон болж бүтэхгүйн дунд сайн мэдээ байсныг ч онцлох хэрэгтэй. Оюутнуудын хувьд “Хонгилын үзүүрт гэрэл харагдах” мэдээг шийдвэр гаргагчид өглөө. Эх орныхоо дөрвөн зүг, найман зовхист автомашинаар аялж, малчдын ахуй байдалтай танилцаад ирсэн Ерөнхий сайд амласан амлалт, хэлсэн үгээ ажил хэрэг болгохоор шуурхайллаа. Зас­гийн газрын хуралдаанаар “Хү­ний хөгжил сан”-гаас иргэн бүрт олгох нэг сая төгрөгөөр тодорхой хувийг сургалтын төлбөрт оруулах асуудлыг хэрэлцэж шийдвэрт хүр­сэн юм. Тодруулбал, төрийн өм­чийн болон хувийн хэвшлийн их, дээд сургууль, коллежийн оюутнууд он дуустал сургалтын төлбөрөө өөрсдөө төлнө. Харин он гаруут “Хүний хөгжил сан”-гаас төлбөрийг нь хийхээр боллоо. Ерөнхий сайд Засгийн газрын дээрх шийдвэрийг ажил хэрэг бол­гох үүргийг Бо­ловсрол, соёл, шинж­лэх ухааны сайд Ё.Отгонбаяр, Сангийн сайд С.Баярцогт өгсөн. Оюутнуудыг баярлуулсан энэ мэ­дээтэй зэрэгцэн Ерөнхий сайд мөрийн хөтөлбөрөө хэрэгжүүлэхээр оюутнуудад тэтгэ­лэг олгох тухай төслөө Засгийн газарт хүргүүлэв. Төрийн зүгээс оюутнуудад анхаарч байгааг зарим их, дээд сургуулийн удирдлагууд харин эсэргүүцэж бай­гаа сураг дуулдсан. Бүр зарим сургуулиудийн удирдлага оюутнуудаа төлбөрөө зуун хувь төл гэж шаардаж байгаа аж. Тэгэхээр оюутнуудад найдвар төрүүлсэн Засгийн газар амлалт ажил хэрэг болтол нэлээд замыг туулах нь тодорхой байна. 

Үүнээс гадна Ерөнхий сайдыг орон нутагт ажиллаж байхад ир­гэд ажлын байр шаардсан аж. Тиймээс Засгийн газар аймаг, орон нутаг, сум, дүүргээр нь квотлон 3300 хүнийг Оюутолгой төслийн хү­рээнд сургалтад хамруулахаар боллоо. Сургалтад хамрагдсан ир­гэдээс шалгалт авч, тэнцсэнийг нь ганц Оюутолгой биш уул уурхайн компаниудад ажилд оруулна гэд­гийг салбарын Ё.Отгонбаяр сайд онцолсон. 

Засгийн газрын тэргүүн орон нутгаас ирсэн аяны богцоо ийн задалж байх зуурт ардчилагчид орон нутагт буухиалж байна. Ардчилсан намын­хан төв, баруун бүсийн чуул­га уулзалт зохион байгуулж ирэх УИХ-ын сонгуульд хэрхэн орол­цох төлөвлөгөөгөө хэлэлцээд ир­лээ. Тэдний араас Ардчилсан на­маас угшилтай Ардчилсан хүний холбооныхон нэхэж явна. Муур хулганы үлгэр шиг нэгийгээ хөөн давхих Ардчилсан нам, Ардчилсан хүчний холбооныхны энэ үйлдэл ардчилагчдын дотоод хямрал туйлдаа хүрснийх гэж улстөрчид дүгнэж байна.
Ардчилсан намынхныг ийн хө­дөөгүүр зугаалж, чуулж явах хой­гуур тэднийг МАХН-тай нь хамт шүүхэд өгө­хөө “Улс үндэстнээ аваръя” нэртэй бүлгэмийнхэн зарлав. О.Лхаг­вадорж, Г.Дашдэмбэрэл нар эрх баригч хоёр том намынхан нийлж улс үндэстээ мөхөөх гэж байгаад эгдүүцэж буйгаа сэтгүүлчдэд мэ­дээлсэн нь өнгөрсөн долоо хоно­гийн хоржоонтой үйл явдлын нэг байлаа.

“Гурил ховордоно, үнэ нь тэнгэрт гарлаа” гэсэн хар мэдээний сургаар Ерөнхий сайд асан С.Баяр “Атрын III” аянаа шалгаад ирлээ. Тэгэхдээ “Бид 300-350 тонн ургац хураахад л хойш хөршөөс гуйхгүйгээр хүнсний хэрэгцээгээ хангаж чадна” гэж ургацын дээжийг тэврэн баяртайгаар мэдэгдсэн нь сонины хуудаснаа үлджээ.
Улс төрд өрнөсөн дээрх үйл явдлаас гадна Гадаад харилцааны яам, Батлан хамгаалахын салбар гадаадын зочдын хөлд дарагдаж, багагүй бэлэг хүртсэн билээ.

Б.ЦЭЦЭГДЭЛГЭР

Зохиогчийн эрх:
 "Улс төрийн тойм" сонин