Мьянмарт өнгөрсөн оны хоёрдугаар сард болсон цэргийн эргэлтээс хойш тус улсын цэргийн удирдагч анх удаа НҮБ-ын тусгай элчтэй уулзлаа. НҮБ-ын Мьянмарын асуудал эрхэлсэн тусгай элч Ноэлин Хейзер өчигдөр /2022.08.17/  тус улсын нийслэл Нейпитавт цэргийн дарга Мин Аун Хлайнтай уулзав. Уулзалтын үеэр Хэйзер хүчирхийллийн бүх хэлбэрийг нэн даруй зогсоож, хүний ​​эрх, хууль дээдлэх ёсыг бүрэн хүндэтгэн, баривчлагдсан хүмүүсийг суллахыг уриалсан байна.

Хейзер удирдагч асан Аун Сан Су Читэй уулзах хүсэлт тавьсан ч цэргийн удирдагч зөвшөөрөөгүй аж.

НҮБ өнгөрсөн жилийн төрийн эргэлт гарснаас хойш Мьянмарт тусгай элчээ илгээхээр оролдсон бөгөөд энэ удаагийн хэлэлцээгээр асуудалд шийдэл олохыг зорьж байна. Талууд цаашид нээлттэй яриа хэлэлцээг үргэлжлүүлэхээр тохиролцсон байна.

Нөгөөтэйгүүр НҮБ-ын тусгай элч Мьянмарын цэргийн даргатай уулзсан нь цэргийн засгийн газрыг хүлээн зөвшөөрч буй хэрэг гэж шүүмжлэгчид үзэж байна. Тэгвэл Хейзерийн мэдэгдэлд дурдсанаар түүний айлчлал нь НҮБ-ын санаа зовнилыг илэрхийлэх зорилготой бөгөөд "НҮБ-ын оролцоо ямар ч тохиолдолд хууль ёсны байна" гэжээ.

Эх сурвалж: NHK JAPAN