Хаврын чуулган завсарлаж, улс төр унтаа байна. Эрх баригчид энэ хаврын чуулганаар Үндсэн хуулийн нэмэлт өөрчлөлтийг ярьж, намуудтай санамж бичигт гарын үсэг зурж тойрогтоо ажиллаж, иргэдийн саналыг сонссон ч найр наадам, үнийн өсөлт инфляци, дизелийн үнэ нэмэгдсэнээр ҮНХӨ-ийг түр хойшлуулсан.

Тэгвэл энэ сарын дундуур улс төр амь орж, эрх баригчид амралт зугаалгаасаа хэсэг хөндийрч, ээлжит бус чуулганаар ҮХНӨ-ийг ярих байх гэсэн хүлээлт байна. Энэ хаврын турш яригдсан ҮХНӨ-ийн талаар МАН-ынхан дорвитой шийдэлд хүрээгүй. Угтаа бол МАН-ын зодоон нэг талдаа гарч ойлголцолд хүрвэл тэд ҮХНӨ-ийг зүтгүүлэх нь гарцаагүй.

Наадмын өмнөхөн хуулийн төслийг боловсруулаагүй байгаа, иргэдийн саналыг сонсоно гэсэн бөөрөнхий тайлбарыг гишүүд өгч байв.  Хэрэвзээ ээлжит бус чуулган зарлахгүй бол ирэх намрын чуулганаар ҮХНӨ-ийг ярих нь үлгэр болох биз ээ. Намрын чуулган ирэх аравдугаар сарын 15-ны өдөр нээлтээ хийх товтой. Иймээс ҮНХӨ-ийг явуулах цаг хугацаа нь одоо таарч байгаа юм.  Улс төрийн хүрээнд ч тэр ҮХНӨ-ийг явуулахын тулд энэ сарын 15-нд ээлжит бус чуулган зарлах тухай яриа өрнөөд эхэлсэн.

Хэрэв ээлжит бус чуулган зарлахгүй бол эрх баригчдын хүсэл талаар болж, намраас үнийн өсөлт, инфляци иргэдийн түрийвчийг тэмтрэх учраас ҮХНӨ-ийг дэмжих нь юу л бол. Үүнээс гадна Засгийн газар энэ онд хоёр яам шинээр байгуулсан. Гэвч өдгөөг хүртэл шинэ яамдын сайд нарын томилгоо хийгээгүй нь ҮХНӨ-тэй холбоотой билээ. Тиймээс  эрх баригчид ҮНХӨ-ийг яаравчлан хийж, давхар дээлтэй гишүүдийн тоог нэмж, шинэ сайд нарыг удахгүй томилох дүр зурагтай байна.