СХД-т 3 цэцэрлэг, 2 өргөтгөлийн барилга ашиглалтад орно

Сонгинохайрхан дүүргийн хэмжээнд 2022-2023 оны хичээлийн жилд 10, 24, 31 дүгээр хороодод нийт 550 хүүхдийн шинэ цэцэрлэг, 16, 19 дүгээр хороодод 350 хүүхдийн цэцэрлэгийн өргөтгөл шинээр ашиглалтад ороход бэлэн болсон. Мөн сургуулийн өмнөх боловсролын үйлчилгээг хүртээмжтэй болгох үүднээс дөрвөн байрыг худалдан авах, гурван байршилд түрээслэхээр болсон.

Эдгээр байршлын нэг болох 33 дугаарр хорооны 180 хүүхдийн хүчин чадалтай түрээсийн цэцэрлэгтэй Боловсрол, шинжлэх ухааны сайд Л.Энх-Амгалан болон бусад холбогдох албаныханы хамтаар танилцаж, зарим шийдвэрүүдийг гаргалаа.

"Содон" хороололд 400 хүүхдийн багтаамжтай цэцэрлэгийг худалдан авахаар болжээ. Тодруулбал, Тухайн түрээсийн барилгын тохижилтын ажлыг бүрэн шийдэх, бусад цомцог цэцэрлэг, түрээсийн байр, содон хороолол доторх 400 хүүхдийн багтаамжтай цэцэрлэгийн барилгыг худалдан авч хамрагдалтыг 100 хувь болгох шийдвэрт хүрлээ.

Сонгинохайрхан дүүргийн хувьд 2021-2022 оны хичээлийн жилд төрийн өмчийн 26, төрийн бус найм, нийт ерөнхий боловсролын 33 сургуульд 60 мянга гаруй сурагчид хичээллэж байна. Харин 60 цэцэрлэгт сургуулийн өмнөх насны 25 мянга гаруй хүүхэд хамрагдаж байгаа. Энэ жил 4800 гаруйгаар орыг нэмэгдүүлж хамрагдалтыг 92,3 хувьд хүргэхээр ажиллаж байна.

Сургуулийн хүртээмжийг нэмэгдүүлэх зорилтын хүрээнд 2009-2021 онуудад 320-960 хүүхдийн суудалтай ерөнхий боловсролын 11 сургууль, найман өргөтгөл, хоёр дотуур байр шинээр баригдсанаар сургуулийн суудлын тоо 9620-аар нэмэгдсэн. Өнгөрсөн 2021 онд БНХАУ-ын буцалтгүй тусламжаар 26 дугаар хороонд 920 хүүхдийн хүчин чадалтай 152 дугаар сургууль, 27 дугаар хороонд 640 хүүхдийн 154 дүгээр сургууль, Азийн хөгжлийн банкны санхүүжилтээр 122 дугаар сургуулийн 640 хүүхдийн хүчин чадалтай өргөтгөлийн барилга тус бүр шинээр ашиглалтад орсноор, суудлын тоо 2200-аар нэмэгдээд байна. Түүнчлэн Улсын төсвийн хөрөнгө оруулалтаар 74 дүгээр сургуулийн 70 хүүхдийн ортой дотуур байр ашиглалтад ороод байна.

Одоогийн байдлаар улсын төсвийн хөрөнгөөр 62 дугаар сургуулийн 640 хүүхдийн суудалтай барилгын өргөтгөл, улсын төсвийн хөрөнгөөр 32 дугаар хороонд баригдаж буй 640 хүүхдийн суудалтай 150 дугаар шинэ сургуулийн барилга, улсын төсвийн хөрөнгөөр 76 дугаар сургуулийн 320 хүүхдийн суудалтай өргөтгөлийн барилгын ажлууд санхүүжилтээс болоод гацсан байгаа гэдгийг сайдад уламжиллаа. Энэхүү барилгуудын төсвийг яаралтай шийдвэрлэн өгч, ашиглалтад оруулна гэдгийг Боловсрол, шинжлэх ухааны сайд Л.Энх-Амгалан хэллээ.

Мөн тэрбээр Сонгинохайрхан дүүрэг боловсролын хүртээмжийн асуудлаа маш сайн шийдэж чадсанд баяртай байна. Сургуулийн өмнөх боловсролын 5 цэцэрлэг, 4 сургуулийн барилгын асуудлыг яаралтай дуусгаснаар 100 хувьд хүрэх боломжтойг онцолж байлаа.