“Трио” уран сайхны кино А зэрэглэлийн олон улсын наадамд оролцох, урилга хүлээн авчээ. Монгол уран бүтээлчдийн хийсэн уг кино 2022 оны аравдугаар сард болох 38 дахь удаагийн Варшавын олон улсын кино наадамд оролцох болсон талаар уран бүтээлчид дуулгав.

“Трио” кино нь Варшавын олон улсын кино наадамд танилцуулах Монголын хамгийн анхны уран бүтээл болж байгаа бөгөөд киноны найруулагч, жүжигчин Д.Баттөмөрийг Варшавын олон улсын кино наадам албан ёсоор урьжээ.

Монголын кино урлагийн түүхэнд дауны хам шинжтэй хүүхэд анх удаа кинонд тоглож, хүний эрх, хөгжлийн бэрхшээл, хүртээмжтэй нийгэм, байгаль эх, тогтвортой хөгжил, үндэсний өв уламжлал, нүүдлийн соёл, буддын шашин, үндэстний ижилсэл гэсэн том сэдвүүдийг энэ кинонд хөндсөн. Энэхүү олон улсын кино наадам уран бүтээлийг Оскарын шагнал авахаас өмнө олон нийтэд танилцуулж, кино найруулагчийг нь Каннд шалгарахаас өмнө дэлхийд өргөмжлөх зорилготой аж.