Хорват улсын Липик хотноо болсон “FIBA 3х3” дэлхийн гранприд Монголын Улаанбаатар ММС Энержи баг амжилттай оролцлоо. Манай баг “D” хэсэгт Хорват, Германы багуудтай таарсан.

Хэсгийн тоглолтуудын үр дүн:

• Улаанбаатар ММС Энержи 20:15 Хорватын Загреб
• Улаанбаатар ММС Энержи 21:15 Германы Дузельдорф

Ийнхүү хоёр тоглолтын дараагаар хоёр хожилтой хэсгээ тэргүүлэн хасагдах шатанд шалгарсан.

Хасагдах шатанд “Токио 2020” олимпийн аварга Латвийн Рига багийг 21:15 харьцаатай хожиж, хагас шигшээд шалгарсан. Монголын баг Латвийн багийг олимпийн аварга болсноос нь хойш хоёр дахь удаагаа хожиж байгаа нь энэ. Улмаар хагас шигшээд Сербийн Лиман багтай таарч, 10:18 харьцаатай хожигдсоноор дэлхийн гранпригийн гуравдугаар байрт шалгарч, 6 мянган ам.доллар болон Лузанн хотод болох дэлхийн Их дуулгын эрх авлаа.

Монголын 3х3 сагсан бөмбөгийн холбооны мэдэгдэлд “Ази тивийн багуудаас Европын дэлхийн гранприд анх удаа байр эзэлж амжилттай оролцсон Улаанбаатар ММС Энержи багтаа халуун баяр хүргэж ирэх долоо хоногт Прагийн Их дуулгад нь амжилт хүсье” гэжээ.