Аймаг, сумд, алслагдсан дүүргүүдийн наадам болж, зарим нь ч хэл ам таталж эхлэв. Тухайлбал, Багахангай дүүргийн наадам. Өнөөдөр/2022.07.21/ тус наадмын хүчит бөхийн барилдаанд 128 бөх барилдах хуваарьтай. Хамгийн сонирхолтой нь 128 бөхийнх нь 64 нь улсын цолтон гэж байгаа. Улсын цолтнуудад давхар аймгийн цол олгодог болчихсон юм уу гэж зарим хүн гайхаж байх шиг. Зарим нь аймгийн наадамд очиж найраа хийн, мөнгө горьдож, хор найруулах гэж байна ч гэж хардаж байна.

Алслагдсан ганц дүүргийн наадам бараг л улсын баяр наадам шиг чансаатай болох төлөвтэй.

Саяхан шинээр батлагдсан Баяр наадмын тухай хуулийн "9.7.Үндэсний их баяр наадмын бөхийн барилдаанд барилдах бөхийг үндэс угсаа, төрсөн газар, оршин суугаа засаг захиргааны нэгж, цол, чимгээр нь ялгаварлан барилдах эрхийг хязгаарлахыг хориглоно" гэж заачихсан.

Тэгэхээр улсын цолтнуудыг аймаг, сум, дүүргийн наадамд зодоглож буйг буруутгаж болохгүй. Гэхдээ л аймгийн цол мөрөөдөж, бэлтгэл сургуулилалтаа хийж буй залуучуудын боломжийг хулгайлж эсвэл мөнгө горьдох нь жудаггүй үйлдэл буй за. Аймгийн цол горилж залуу бөхчүүд жилийн жилд аймаг, аймаг дамжиж наадамд оролцдог нь нууц биш.

Гэхдээ бөх сонирхогчдын эсэргүүцэлтэй тулсан улсын цолтнууд эхнээсээ барилдахаа болилоо гэдгээ зарлаж байна. Тухайлбал, улсын харцага Б.Зоригтбаатар, О.Мөнх-Эрдэнэ тэргүүтэй Архангайн бөхчүүд болон шинэхэн заан Б.Серик нар барилдахгүй гэдгээ мэдэгджээ.

Б.Зоригтбаатар харцага өөрийн цахим хуудаснаа “Ардын хувьсгалын 100, 101 жилийн ойдоо сайхан барилдаж цолоо баталлаа. Багахангай дүүргийн наадамд барилдахаар бүртгүүлсэн ч олон сумын цолтой бөхчүүд оролцох боломжгүй болсон учир нэг ч гэсэн сумын цолтой бөхөд боломж олгож энэ барилдааны бүртгэлээс өөрийн нэрээ хасуулж байгаагаа үүгээр мэдэгдэе. Монгол бөхийн босоо цагаан хийморь та бүхнийг өнөд ивээх болтугай” гэжээ.