Буйр нуураас хясаа түүж, чанаж идэж болохгүйг Экологийн цагдаагийн албанаас зөвлөж байна. Учир нь нас биед хүрсэн хясаа ойролцоогоор 190 литр усыг таван цагт цэвэршүүлдэг аж. Буйр нуурт амьдардаг дагуурын сувдан хясаа, дэлт танан хясаа нь Монгол орны улаан номонд оржээ.

Шохойлог бодисоос тогтсон хатуу хавтас нь нуур, голын ёроолын элсэнд шигдэн амьдрахад зохицсон. Хавтасны завсраар цухуйх булчинлаг хөлөөрөө алгуурхан хөдөлж шилждэг. Хясаа тайван үедээ хавтсаа нээж, биеэ хамгаалахдаа булчингууд нь идэвхтэй ажиллаж хавтсаа хаана. Хясаа нь ягаавтар өнгөтэй салбант нялцгай биетэй. Салбангаас ялгарсан шүүс нь шохойлог бодис ихээр агуулдаг. Хясаа ус цалгилах, гэрэл, харанхуйг мэдэрдэг байна. Эм хясааны өндгөн эс, эр эстэй усанд нийлж үр тогтдог.

Өсөлт удаантай. Нуураас агнаж буй загасны тороор шүүгдэн хорогдохоос гадна усны бохирдол, хатаж ширгэх зэрэг байгалийн хүчин зүйлийн нөлөөгөөр тоо толгой нь ховордож байгаа тул бид хайрлан хамгаалах ёстойг судлаачид анхааруулж байна.