Засгийн газрын “Шинэ сэргэлтийн бодлого”-ын нэг хэсэг, Аж үйлдвэрийн сэргэлтийн хүрээнд “Оюутолгой”-н гүний уурхайн үйлдвэрлэл энэ оны нэгдүгээр сард эхэлсэн. Нээлтэд Монгол Улсын Ерөнхий сайд Л.Оюун-Эрдэнэ, Рио Тинто группийн гүйцэтгэх захирал Якоб Стаусхольм нар оролцож, гүний уурхайн үйлдвэрлэлийн эхний шат буюу анхны тэсэлгээ хийх команд өгсөн билээ.

“Рио Тинто” группийн Гүйцэтгэх захирал Якоб Стаусхольм энэ сарын 14-нд Монгол Улсын Ерөнхий сайд Л.Оюун-Эрдэнэтэй уулзах үеэрээ “Гүний уурхайн бүтээн байгуулалтын ажлыг эрчимжүүлж, хугацаанаас нь өмнө ашиглалтад оруулахаар ажиллаж, яриа хэлэлцээнүүд амжилттай үргэлжилж, ойлголцохгүй асуудал гарахгүй байгааг хэлжээ.

Талууд гүний уурхайн бүтээн байгуулалтын ажлыг 2023 оны эхний хагаст багтааж бүрэн ашиглалтад оруулахаар харилцан тохиролцсон билээ.

Мөн тэд “Оюутолгой” ордын ашиглалтад Монгол Улсын эрх ашгийг хангуулах тухай УИХ-ын тогтоолын хэрэгжилт, “Рио Тинто” групптэй хийж буй Засгийн газрын хэлэлцээний явцын талаар санал солилцсон байна.

"Оюутолгой" компани 2022 оны нэгдүгээр улирлын тайландаа “Уурхайн ашиглалтын төлөвлөгөөний дагуу бага агуулгатай хүдэр олборлолт, металл авалтаас хамааран ил уурхайгаас олборлосон зэсийн агууламж өнгөрсөн оны мөн үетэй харьцуулахад 33 хувиар буурсан" гэж дурджээ.

Б.ЖАРГАЛ