Винсент Ван Гог   өөрийн хөрөг зургийг өөр нэгэн зургийн ард нуусан байсныг илрүүлжээ. Шотландын Үндэсний галерейн мэргэжилтнүүд үзэсгэлэнгийн өмнө Ван Гогийн нэгэн зотон зургийг рентген туяагаар харах  үед түүний хөрөг ард нь нуугдаж буйг олж илрүүлсэн байна. Нуугдсан Ван Гогийн  хөрөг нь "Тариачин эмэгтэйн толгой" хэмээх бүтээлийн ар талд цавуу, картон цаасаар бүрхэгдсэн байв.

Галерейн ахлах консерватор Лесли Стивенсон тухайн үед зураачийг зурагны цаанаас  харж байгааг үзээд  "шоконд орсон" гэж ярьжээ.

Голландын зураач Ван Гог мөнгө хэмнэхийн тулд ихэвчлэн зотон даавууг дахин ашиглаж, эргүүлж, дараа нь нөгөө талд нь ажилладаг байв. Түүний бүтээл амьд ахуйд нь  борлогдоогүй бөгөөд алдар нэр нь 1890 онд буюу 37 насандаа нас барсны дараа л иржээ. Ван Гог барууны урлагийн түүхэн дэх хамгийн алдартай, нөлөө бүхий хүмүүсийн нэг болсон юм.

Эх сурвалж: BBC