Тулгар төрийн 2230, 2231, Их Монгол улсын 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадмын хурдан дааганы уралдаанд 440 хурдан даага бүртгүүлсэн. Түүнээс түрүү магнайд Сэлэнгэ аймгийн Баянгол сумын уяач Бүжинлхамын Болдбаатарын хээр даага хурдалж, тод магнай торгон жолоогоо өргүүлсэн билээ.

Дааганы уралдаанд 846 дугаартай оролцсон унаач хүү Мөнх-Эрдэнийн унасан даага энэ жилийн "баян ходоод"-оор шалгарав. Унаач хүү н.Мөнх-Эрдэнэ хэлэхдээ "За яах вэ, аль болох унахгүйхэн шиг явж байгаад ирлээ. Энэ жил даага л унаж байна. Улсын наадам гоё л байна. Даагаа амраагаад л явуулаад байсан. Уралдаан эхлэхэд "Амаа сайн дараад, сайн шахасхийгээд яваарай гэж хэлсэн" гэв.

Б.ЖАРГАЛ