Баяр наадмын өдрүүдэд замын хөдөлгөөнд хийх зохицуулалтын талаар ТЦА-ны Замын цагдаагийн газрын хэлтсийн дарга, дэд хурандаа Н.Ганбат өнөөдөр /2022.07.10/ мэдээлэл өглөө.

Тэрбээр, наадмын өдрүүдээр замын хөдөлгөөнд оролцож байгаа иргэдийн аюулгүй байдал, ая тухтай зорчих нөхцөлийг бүрдүүлж, замын хөдөлгөөн зохицуулах чиглэлээр Тээврийн цагдаагийн албанаас 580 алба хаагч Төв цэнгэлдэх хүрээлэн болон бусад гудамж, замд ажиллана. Үүнд Хүй долоо  худагт үүрэг гүйцэтгэх алба хаагчдын тоо ороогүй. Наадмын Тохижилт, засвар, худалдаа үйлчилгээний салбар хорооноос бэлтгэсэн зогсоолуудад алба хаагчид хяналт тавьж ажиллана.

Төв цэнгэлдэх хүрээлэнгийн зогсоолын тоо хязгаарлагдмал байгаа учир нийтийн тээврээр түлхүү үйлчлүүлэхийг иргэддээ уриалж байна.

Мөн Замын цагдаагийн газраас иргэдийг хөдөлгөөнд оролцож байгаа үед ая тухтай, осол авааргүй зорчуулах үүднээс хяналтын цэгүүд гаргасан.  Анхааруулахад хэд хэдэн байршилд зам хаана. Тухайлбал, Төв цэнгэлдэх хүрээлэн орчмын замын хойно буюу Гандигийн гудамж, урд буюу Нийслэл хүрээ өргөн чөлөөг долдугаар сарын 11-12-нд хязгаарлана.

Хязгаарлалттай бүсүүдэд зөвшөөрөлтэй тээврийн хэрэгслүүд болон шуурхай албаны тээврийн хэрэгслүүд, нийтийн тээврийн үйлчилгээ явна.

Тухайн хязгаарлалтын бүсийн оршин суугчид буюу Хан-Уул дүүргийн 15, 18-р хорооны иргэдэд тухайн хорооны Засаг даргаас зөвшөөрөл олгоно. Тухайн хороодын иргэн иргэний үнэмлэх, хорооны тодорхойлолт, түрээсийн байранд амьдардаг иргэд түрээсийн гэрээ гэсэн бичиг баримтын аль нэгийг зөвшөөрлийн хамт үзүүлж хөдөлгөөнд оролцоно. Иймд нийт хөдөлгөөнд оролцож байгаа иргэд та бүхэн зохих зөвшөөрлийг авч, заасан маршрутын замаар хөдөлгөөнд оролцохыг уриалж байна. Хүй долоо худагт шаардлагатай тохиолдолд хөдөлгөөнийг нэг урсгалд оруулдаг. Тухайн үеийн нөхцөл байдал, хөдөлгөөний эрчмээс шалтгаалан шийдвэр гаргана. Энэ талаар иргэдэд тухай бүрд мэдэгдэж ажиллана гэв.

12 БАЙРШИЛД 6540 ТЭЭВРИЙН ХЭРЭГСЛИЙН БҮХИЙ ЗОГСООЛ БЭЛДСЭН

Харин зогсоолын тухайд Улаанбаатар хотын Захирагчийн ажлын албаны Хотын инженерийн байгууламжийн хэлтсийн дарга Ц.Нямцэвээн мэдээлэл өгөв. Түүний хэлснээр Улаанбаатар хотын хэмжээнд нийт 12 байршилд 6540 тээврийн хэрэгслийн багтаамж бүхий зогсоол бэлдсэн.

Тэдгээр 12 байршлаас зургаад нь наадмын зөвшөөрөл бүхий тээврийн хэрэгсэл, үлдсэн зургаан байршилд наадмын зөвшөөрөлгүй тээврийн хэрэгслүүд зогсох боломжтой.

Зөвшөөрөл аваагүй иргэд тэдгээр зургаан байршил дахь зогсоолд машинаа тавиад Төв цэнгэлдэх хүрээн болон Хүй долоо худаг руу нийтийн тээврээр зорчиж болно. Зогсоол дээрх тэмдэг тэмдэглэгээ зэргийг хийж дуусан, наадамчин олноо хүлээж авахад бэлэн болоод байна гэсэн юм.