Баяр наадмын өдрүүдэд өрх, дүүргийн эрүүл мэндийн төвүүд, улсын томоохон эмнэлгүүд нэмэлт хуваарийн дагуу ажиллана. Яаралтай, зайлшгүй тохиолдолд утсаар цаг авч үйлчлүүлэхийг зөвлөж байна. Учир нь улсын бүх эмнэлэгтэй урьдчилан холбогдож, цахим дугаар авах боломжтой болсон. Тиймээс баярын өдрүүдэд эмнэлэгт дугаарлахгүйгээр урьдчилж цаг авахыг зөвлөж байна.

Цахимаар өрх, дүүрэг, улсын томоохон эмнэлгүүдэд үзлэгийн цаг авахын тулд иргэд эрүүл мэндийн даатгалаа заавал төлсөн байх ёстой аж.

Мөн цахимаар авсан үзлэгийн цагаасаа 30 минутын өмнө ирж цахим бүртгэлийн ажилтан дээр цагаа баталгаажуулах хэрэгтэйг албаныхан онцолжээ. Хэрэв цахимаар авсан цагаа баталгаажуулаагүй бол автоматаар цуцлагдах юм байна. Үзлэгийн цаг болон үзлэгийн кабинетыг сонгоход үзлэг хийх эмч сонгогдохгүй бол тухайн өдөр захиалах цаг байхгүй байна гэсэн үг. Хэрэв та цагтаа амжихгүй болон нэмэлт дэлгэрэнгүй мэдээлэл авахыг хүсвэл дараах дугаараар эмнэлэгүүдтэй холбогдоорой.

• Улсын нэгдүгээр төв эмнэлэг – 1900-2111 болон 1800-0119
• Улсын хоёрдугаар төв эмнэлэг – 70150234, 70150233
• Улсын гуравдугаар төв эмнэлэг – 77046666, 77000352
• Хавдар судлалын үндэсний төв – 70162529
• Эх хүүхдийн эрүүл мэндийн үндэсний төв – 80809102
• Хүүхэд – 70141403
• Эмэгтэйчүүдийн тасаг – 70121201
• Арьсны өвчин судлалын үндэсний төв – 70135036
• Гэмтэл согог судлалын үндэсний төв – 70187797, 70180136
• Шүд эрүү нүүрний төв – 325731
• Баянзүрх дүүргийн Эрүүл мэндийн төв – 70150065, 454004
• Чингэлтэй дүүргийн эрүүл мэндийн төв – 70007105, 314587
• Сүхбаатар дүүргийн Эрүүл мэндийн төв – 350790
• Сонгинохайрхан дүүргийн Эрүүл мэндийн төв – 631108
• Хан-Уул дүүргийн Эрүүл мэндийн төв – 379258

НИЙСЛЭЛИЙН ЭРҮҮЛ МЭНДИЙН ТӨВҮҮД 10:00-15:00 ЦАГТ АЖИЛЛАНА

Баярын өдрүүдэд нийслэл дэх эрүүл мэндийн байгууллагууд хэрхэн ажиллах талаар Нийслэлийн Эрүүл мэндийн газрын Лавлагаа шатлалын тусламж үйлчилгээ хариуцсан мэргэжилтэн Д.Энхтүвшингээс тодрууллаа.

Тэрбээр, Нийслэлийн Эрүүл мэндийн газрын даргын тушаал гарч баяр наадмын өдрүүдэд эмнэлгийн тусламж үйлчилгээний тасралтгүй байдлыг урьдын адил хангаж ажиллаж, эрүүл мэндийн газрууд шуурхай штабын хариуцлагатай жижүүр гарган бэлэн байдлыг хангаж ажиллана. Ингэхдээ долдугаар сарын 11-18-н хүртэл нийслэлийн Шүд, эрүү нүүрний төвийн хоёр кабинет, дүүргийн эрүүл мэндийн төвүүдийн гэмтэл, мэс засал, дотор, шүдний кабинет 10:00-15:00 цагийн хооронд ажиллана. Харин Өрхийн эрүүл мэндийн төвийн үйл ажиллагаанд зохицуулалт хийж 10:00-15:00 цагийн хооронд ажиллах юм гэлээ.