Сураггүй алга болсон “крипто хатан хаан” Ружа Игнатоваг АНУ-ын Холбооны мөрдөх товчоо хайж байна. Тэр байтугай хамгийн их эрэлхийлж буй топ 10 хүний жагсаалтдаа оруулжээ.

Ружа Игнатова нь 40 гаруй настай болгар эмэгтэй бөгөөд “Onecoin” нэртэй криптовалютын луйврын хэрэгт оролцсон. Тэрбээр хохирогчдын дөрвөн тэрбум гаруй ам.долларыг залилсан байна. “Onecoin” нь сүлжээний бизнес маягаар худалдан авагчдын дунд дэлгэрсэн бөгөөд валютыг илүү олон хүнд зарсан тохиолдолд шимтгэл авах тогтолцоотой байжээ.

“Onecoin” нь бусад криптовалютын ашигладаг блокчейн технологиор хамгаалагдаагүй байсныг Холбооны мөрдөх товчоо илрүүлжээ. Тиймээс АНУ-ын албаныхан түүнийг аль 2017 онд баривчлах тушаалд гарын үсэг зурсан хэдий ч Ружа Игнатова одоо хүртэл ор сураггүй байна.

“Криптовалют анх зах зээлд гарч эхлэх үеийн галзуурлыг энэ эмэгтэй маш сайн ашиглаж, төлөвлөгөө боловсруулсан” прокурор Дамиан Уильямс хэллээ.

Холбооны мөрдөх товчооноос Пүрэв гаригт гаргасан мэдэгдэлд дурдсанаар, Игнатоваг баривчлахад тус болох аливаа мэдээлэл өгсөн хүнд 100 мянган долларын шагнал өгнө гэжээ. Тэрбээр Холбооны мөрдөх товчооны хамгийн их эрэн сурвалжлагдаж буй 10 хүний жагсаалт дотроос ганцаараа эмэгтэй юм.

Игнатова хамгийн багадаа 500 сая доллар авч оргон зайлсан тул түүнийг олоход маш хэцүү байгаа аж. “Бид түүнийг хуурамч бичиг баримттай бөгөөд гадаад төрхөө өөрчилсөн гэж үзэж байна. Аль эсвэл тэр нас барчихсан ч байж болзошгүй” гэж Игнатовагийн хэргийг олон жил шалгаж буй мөрдөгч хэллээ. Игнатова хамгийн сүүлд 2017 онд Болгараас Грек рүү нисэх онгоцонд суусан байна.

Эх сурвалж: BBC