Хариуцсан асуудлаа мэддэг, хийсэн ажилдаа эзэн болсон төрийн албан тушаалтан тун чиг ховор болжээ. Түмэн асуудал, буман бухимдал болоод байхад түүнд хариулт өгдөг, асуудлыг шийддэг сайд, дарга тун чиг ховор. Аргаа барсан Ерөнхий сайд Дарханы замын бодит байдалтай өөрийн биеэр танилцахаар явж байна. Гэтэл Зам тээврийн сайд нь "Ерөнхий сайдтай газар дээр нь очоод үз" гэх хөгийн үг ордонгийн хонгилоор зугтаж явахдаа унагаах жишээтэй.

Дарханы зам шатахуун, цементийн хомсдолоос болоод зогсоход хүрчээ. Гэтэл хийсэн ажлаа тайлагнаж, хэнээс юунаас болж асуудал үүссэн тухай олон нийтэд танилцуулах ёстой сайд хэг ёог хийсэн шиг, хүний өмнөөс ажиллаад байгаа аятай явна. Ер нь ордонд хамааралтай болсон эрх мэдэлтнүүдийн нийтлэг төрх нь тэр. Улайм цайм хууль бус үйлдэл хийчээд "Хуулийн хяналтын байгууллагаас нь очоод асуу", "Өөрөө олоод үз", "Чи асууж тодруулаарай" гэх тэнэглэлээр түрий барьдаг болов.

Гэтэл Монголд асуудалгүй зүйл алга. Ачаа барааны эргэлтийн гол зам болсон Дарханы зам 2023 оны аравдугаар сард ашиглалтад орно гэх утгагүй тайлбарын цаана хэдэн мянгаар тоологдох иргэдийн амь нас, эрүүл мэнд, ашиг орлого хэцүүдэж байгааг ухамсарлах ухаан сайдад даан ч алга.

Гэтэл шатахууны үнэ дахиад өгсөх тухай бор шувуу нисээд эхэллээ. Хотын түгжрэлийг шийдэхийг хүссэн иргэдийн хариу болгон хотын дарга шилжилт хөдөлгөөнийг хязгаарлах санал гаргах жишээтэй.

Сэтгүүлчдийн сонирхсон асуултад хариултгүй сэтэртнүүд уухилан, уцаарлан алхангаа асуудлыг өөрт нь огт хамаагүй аятай тайлбар тавиад удлаа. Үр дүнд нь өргөн хэрэглээний бараа, бүтээгдэхүүнийг үнэ өдрөөс өдөрт нэмэгдэж байна.

Хөтөлийн цемент шохойн үйлдвэрийг улсад авсан хэр нь Дарханы замд хэрэглэх цементгүй болж, үнэ нь өсөх жишээтэй. Гэтэл төрд авсан цементийн үйлдвэрийн захирал нь орон нутагт ялих, шалихгүй тоглоомын талбай бариулаад түүгээрээ түмнээс оноо авах гэж попорч явна. Асуудлаа мэддэг, ажлаа хийдэг хүн Монголын төрд үгүйлэгдэж байна.

Асуудлыг шийддэг бус улам хүндрүүлдэг албан тушаалтнуудаас нь болоод "төр аливаа асуудлыг шийдэх гэхээ больчихвол таарна" гэсэн шүүмж олон нийтэд зонхилох болжээ. Эргэлт, сэргэлтийн бодлого энэ янзаараа цаасан дээр үлдэх нь ээ.

Л.Халиу