Удахгүй болох Ардын хувьсгал ялсны 100, 101 жилийн ойн баяр, наадамтай холбогдуулан хаана, ямар чиглэлийн үйл ажиллагааг явуулж болох талаар УБЗАА-ны хүнс, хөдөө аж ахуй, худалдаа, үйлдвэр үйлчилгээний хэлтсийн дарга Т.Золжаргал мэдээлэл өглөө.

"Өмнөх жилүүдийн адил наадмын үйл ажиллагаа Төв цэнгэлдэх хүрээлэнгийн гадна талбайд болон Хүй долоон худаг гэсэн хоёр тойрогт болно. Нийслэлийн хэмжээнд худалдаа үйлчилгээ, хоол үйлдвэрлэлийн чиглэлээр үйл ажиллагаагаа явуулж буй аж ахуйн нэгжүүдэд зөвшөөрөл олгоод явна. Энэ жилийн хувьд зөвшөөрлийг зөвхөн цахимаар олгоно.

Худалдаа эрхлэх хүсэлтэй аж ахуйн нэгжүүдийн хүсэлтийг зургадугаар сарын 29-өөс долдугаар сарын 1-ний өдөр хүртэл www.ulaanbaatar.mn сайтаар бүртгэж авна. Ингэхдээ шаардлага хангасан газруудыг баталгаажуулаад явна. Урьд жилүүдийнхтэй адил ерөнхий шаардлагыг аж ахуйн нэгжүүдэд тавьж байгаа. Мэргэжлийн тогоочтой байх ёстой гэх мэт. Эрүүл ахуйн үүднээс бүтээгдэхүүний гарал үүслийн бичгийг заавал шаардаж байна.

Төв цэнгэлдэх хүрээлэн, Хүй долоон худагт нийт 374 аж ахуйн нэгжүүд худалдаа үйлчилгээ хоол үйлдвэрлэлийн чиглэлээр үйл ажиллагаа явуулна. Цэнгэлдэх хүрээлэнд асар гарна, харин хүй долоон худагт гэрээр үйл ажиллагаагаа явуулна”  гэв.

Г.БҮЖИНЛХАМ