ХЭМНЭЛ уран бүтээлчдийн нэгдэл нь урлагийн төрлүүдээр хэм нийлж хэмнэлээ контемпорари бүтээлээдээр нэгтгэн илэрхийлэх зорилготой байгуулагдаж буй уран бүтээлчдийн нэгдэл юм. Нэгдлийн гишүүд болох куратор, уран бүтээлч Б.Маналжав, зураач Б.Содномдаржаа, уртын дуучин А.Нарандулам нар уран бүтээлээ нэг санаа концептон доор нэгтгэн, үзэгчдийг бүтээлийн нэг хэсэг болгон оролцуулж паблик хэлбэрээр үзэгчдэд бүтээлээ хүргэх нь нэгдэлийн гол зорилго билээ.

Огтлол үзэсгэлэн нь нэгдлийн анхны танилцуулга үзэсгэлэн ба үзэсгэлэнд Б.Маналжав паблик өрөг бүтээл, Б.Содномдаржаа зангилаа бичгийн өрөг бүтээл, А.Нарандулам үйлдлийн урлаг үзүүлэх юм. Үзэсгэлэнгийн концепт нь өнөөдрийн завгүй нийгэм биднийг өөрсдийн дотоод мөн чанараас холдуулж технологид харьяалагдсан сэтгэл оюуныг бүтээн өөрийн дотоод дуу хоолойг үл анзааран буйг тодотгон гаргаж байна.

Б.Содномдаржаагийн зангилаа бичгийн өрөг бүтээл нь хүний гадаад ертөнцийн тэмдэг болох нийгэм, хүмүүний харилцаа түүнээс хүнд тусах тусгалын илэрхийлэл, Б.Маналжавын паблик өрөг бүтээл нь хүний дотоод ертөнцийн амар амгалан, тайвшрал, өөрөөрөө оршихуйн  илэрхийлэл ,  А.Нарандуламын үйлдлийн урлаг, дуу хоолой нь хүний дотоод гадаад ертөнцийн нэгдмэл нэгэн ХЭМНЭЛ ОГТЛОЛын  илэрхийлэл тэмдэг болно…..

Хэмнэл хийгээд хэмнэлд үл захирагдах огтлолууд дунд хар цагаан,  дотор гадна, хэлбэр хэлбэргүйн орон зайд өөрийн дотогшоо өнгийж өөрийгөө чагнан тайвшралыг  мэдрэх арт терапи агшинг энэхүү үзэсгэлэн танд өгөх юм.

         Куратор Б.Маналжав