Саяхан тэрбумтан болсон ЛеБрон Жэймс өөрийн төрөлх Охайо мужийн Акрон хотдоо хөрөнгө оруулалт хийсээр байна. Тэрбээр өөрийн гэр бүлийн сангаараа дамжуулан “I Promise” нэртэй бага сургууль байгуулж байсан бөгөөд энэ удаад “I Promise” нэртэй эрүүл мэндийн анхан шатны тусламж үйлчилгээний төв байгуулахаар болжээ.

2023 онд ашиглалтад орох тус төв нь “I Promise” сургууль, “I Promise” хотхонтой ойр орших гэнэ.

ЛеБрон Жэймсийн гэр бүлийн сангийн гүйцэтгэх захирал Мишель Кэмпбелл ярихдаа “Бид гэр бүлүүдэд хэрэгтэй байгаа зүйлийг сонсч, хариу үйлдэл үзүүлсээр байх тусам бидний ажил урьд өмнө хэзээ ч төсөөлж байгаагүй байдлаар өргөжиж байна. Хямд үнэтэй эрүүл мэндийн тусламж үйлчилгээ үзүүлэх нь манай сангийн хувьд үргэлж чухал асуудал байсан. Ялангуяа цар тахлын улмаас энэ хэрэгцээ шаардлага улам нэмэгдсэн” гэлээ.