Шанхайд хотыг бүхэлд нь хамарсан хөл хориог бүтэн хоёр сарын дараа цуцалсан боловч нэгхэн өдрийн дараа олон дүүрэгт дахин хөдөлгөөний хязгаарлалт тогтоожээ. Бээжингийн эрх баригчдын барьж буй цар тахлыг тэглэх бодлогын улмаас Шанхайн 25 сая оршин суугч сүүлийн хоёр сарын турш гэртээ хоригдож, хоол хүнсээ гаднаас квотоор авч байгаа юм.

Хэдийгээр Шанхайд хөл хориог цуцалсан боловч халдвар тархах өндөр эрсдэлтэй гэж үзсэн бүсүүдэд хязгаарлалтыг дахин сэргээсэн байна. Улмаар хоёр сая орчим хүн дахин хөл хорионд оржээ.

Шанхайн албаныхны мэдээлснээр хотын Жин-ань, Пудон дүүргүүдэд халдварын эрсдэл дунд зэрэг гэж үнэлэгдсэн учраас оршин суугчид 14 хоног гэртээ тусгаарлагдсаны дараа гарч болох гэнэ. Халдвар бүртгэгдсэн дээрх хоёр дүүрэгт нэгдүгээр хавьтлын 26, дам хавьтлын 106 хүнийг олж тогтоон тусгаарласан байна. Түүнчлэн 470 мянган хүнийг дахин шинжилгээнд хамруулжээ.