Монгол Улс мөсөн цирктэй боллоо

Хуучирсан мэдээ: 2022.06.03-нд нийтлэгдсэн

Монгол Улс мөсөн цирктэй боллоо

Монгол Улс мөсөн цирктэй боллоо

Эх үрсийн баярын өдөр "Степпе Арена" компанийн дэмжлэгээр мэргэжлийн циркчид бяцхан хүүхдүүддээ нэгэн онцгой бэлэг барилаа. Мөрөөдөл биелэх "Мөсөн өргөө"-д Монголын циркчдийн мөсөн дээрх анхны тоглолт хоёр удаа тоглогдов. Ингэснээр Монгол Улс мөсөн цирктэй болж байна, циркийн хөгжлийн шинэ үе эхэллээ хэмээн мэргэжлийн циркчид бахархан ярьж байна.

Энэ үеэр Монгол Улсын Ерөнхийлөгчийн Тамгын газрын дарга Я.Содбаатар Монголын анхны мөсөн циркийн тоглолтыг нээж үг хэлэв.

Тэрбээр “Урлаг, Cпорт, гоо зүйн шинэ дэвжээг бүтээж байгаа, “Мөсөн цирк” тоглох мөрөөдлийг биелүүлсэн “Мөсөн өргөө”-г цогцлоогч хамт олон – Степпе Аренагийнхандаа давхар талархал илэрхийлж, нийт хүүхдүүдийнхээ нэрийн өмнөөс болон хувиасаа ажлын өндөр амжилт хүсье. Мөсөн цирк манай улсад анх зохион байгуулагдаж байгаа гэдэг утгаараа манай урлаг, спортын хувьд түүхэн үйл явдал болж байна. Өнөөдөр энэхүү мөсөн өргөөнд дэлхийд алдартай хоккейчин, уран гулгагч болох мөрөөдөлтэй алдрай бяцхан дүү нар маань, аав ээжийнхээ хамтаар хүрэлцэн ирсэн байна. Мөрөөдөл бол хязгааргүй, бас гэгээлэг.

Хэн мөрөөдлийнхөө төлөө хичээн хөдөлмөрлөж, өөрийгөө дайчилж чадна, тэр хүн мөрөөдлөө биелүүлдэг. Манай циркчдийн хувьд мөсөн цирк тоглоно гэдэг ч бас мөрөөдөл байсан гэдэгт эргэлзэхгүй байна. Мөсөн дээр цирк тоглоно гэдэг циркчдээс маань нөр их хөдөлмөр, хичээнгүй зүтгэл, төвлөрөл, ур чадвар шаардсан, амаргүй ажил байсан нь тодорхой. Энэ мөсөн дэвжээнээс, энэ мөсөн театраас, энэ мөсөн циркээс Монголын маргаашийг дэлхийд таниулах, эх орныхоо суу алдрыг ертөнцөд дуурсгах, дэлхийн дэвжээнд өрсөлдөх их мастерууд  төрөн гарна гэдэгт бид итгэж байна" гэв.

Мөсөн циркийн ерөнхий найруулагч Ю.Гэрэлбаатар “Дэлхий дээр мөсөн цирк тоглодог гурван улс байдаг. Манай улс ийнхүү мөсөн цирк тоглодог дөрөв дэх улс боллоо. Энэ удаа бид богино хугацаанд чадах чинээгээр бэлтгэж, сургуулилж хүүхэд багачууддаа бэлэг барилаа. Цаашид тогтмол дасгал сургуулилт хийж, олон төрөл жанрын үзүүлбэр бэлтгэхээр төлөвлөж байна" гэдгийг хэлсэн юм.

Мөсөн циркийн анхны тоглолтод уран нугаралт, олсон дээр явах тэнцвэрийн үзүүлбэр, жонглёр, агаарын цагариг, дээсээр наадагчид, агаарын нисэлт зэрэг сонирхолтой үзүүлбэрүүд багтжээ. Ерөнхий найруулагчаар бүжиг, циркийн мэргэжлийн сургуулийн циркийн тэнхимийн эрхлэгч, найруулагч Ю.Гэрэлбаатар ажилласан бол Монголын Мэргэжлийн циркчдийн нэгдсэн холбоо, Монгол Улсын Консерваторийн циркийн мэргэжлийн сургуулийн уран бүтээлчид бүтээлээ толилуулсан.

“Монголын циркчдийн нэгдсэн холбоо” ТББ-ын циркчдийн зүгээс Монголын уран нугараачид дэлхийн 150 гаруй орноос чадвар чансаагаараа гуравдугаар байрт бичигддэг. Гэвч циркчид, уран нугараачид маань бэлтгэл сургуулилалт хийх, ард түмэндээ уран бүтээлээ туурвих  боломж нөхцөл байдаггүй. Харин “Мөсөн өргөө”-тэй болсон нь гадны орнуудад маш цөөхөн тоглогддог мөсөн циркийн үзүүлбэрийг иргэдэд үзүүлэх боломж бүрдэж байна.

Ер нь циркийн үзүүлбэр нь зардал өндөр, үзүүлбэр гүйцэтгэгчээс ур чадвар шаардагддаг тул цөөхөн тоглогддог. Гэсэн ч бид ард иргэддээ мөсөн циркийн тоглолтыг толилууллаа. Энэ тоглолтоос манай улсын уран бүтээлчдийн ур чадвар, техник технологи, найруулга ямар түвшинд байгааг нүдээр харах боломжтой бөгөөд Олон улсын хүүхдийн эрхийг хамгаалах өдөр толилуулж байгаадаа баяртай байна. Энэ тоглолтыг хийх боломжийг олгож, бүх талаар дэмжсэн Степпе Аренагийн удирдлагуудад талархаж байгаагаа хэлж байв.

Энэ мэдээнд өгөх таны сэтгэгдэл?
15
ЗөвЗөв
4
ХарамсалтайХарамсалтай
2
ГайхмаарГайхмаар
2
ТэнэглэлТэнэглэл
0
ХахаХаха
0
ХөөрхөнХөөрхөн
0
БурууБуруу
Баярлалаа!
NewsMN Гар утасны хувилбар Татах
NEWS.mn

Мэдээллийн эх сурвалж