Хан-Уул дүүргийн тавдугаар хороо Наадамчдын гудамж, Яармаг орчмын замд ачааны автомашины жолооч явган зорчигч, 40-45 орчим настай иргэнийг дайрч, амийг нь хохироосон осол энэ сарын 24-нд бүртгэгджээ.

Цагдаагийн байгууллагаас тухайн ослын газрын үзлэгийг хийн, шалгалтын ажиллагаа явуулахад осол гаргасан жолооч хэргийн газрыг орхиж явсан байв. Мөн тухайн автомашиныг насан хүрээгүй хүүхэд жолоодож байсныг илрүүлсэн байна.

Энэ талаар Цагдаагийн ерөнхий газраас тодруулахад “Эрэн сурвалжлах ажиллагааг шуурхай явуулж, тухайн тээврийн хэрэгслийг олж тогтооход иргэн Э нь согтууруулах ундааны зүйл хэрэглэсэн үедээ хүүхдүүдэд тээврийн хэрэгслээ өгч явуулсан байсан.

Машиныг жолоодсон хүүхэд зам хөндлөн гарч явсан иргэнийг мөргөж, ослын газрыг санаатай орхиж явсныг урьдчилсан байдлаар тогтоосон. Мөрдөх ажиллагаа дууссаны дараа шүүхээс Эрүүгийн хуулийн дагуу хорих ял онооно.

Тус зам тээврийн ослыг шалгаж байгаа. Хохирогч эрэгтэйг хэн болох, гэр бүл, садан төрлийг тогтоохоор ажиллаж байна” гэв.

Тиймээс жолооч, эцэг эхчүүдэд насанд хүрээгүй хүнд жолоо шилжүүлэхгүй байх, архи согтууруулах ундааны зүйл хэрэглэсэн үедээ тээврийн хэрэгсэл жолоодохгүй байхад анхаарч өөрсдийн болон бусдпдын аюулгүй байдлыг хангаж, замын хөдөлгөөний дүрмийг баримтлан хөдөлгөөнд оролцохыг анхаарууллаа.