Шри-Ланкийн шинэ ерөнхий сайд сүүлийн 70 гаруй жилд тохиолдож байгаагүй эдийн засгийн хямралтай нүүр тулж, шатахууны нөөц дуусахад нэг өдөр үлдсэн гэж мэдэгдлээ.

Ранил Викремесингхе телевизээр зайлшгүй шаардлагатай импортын төлбөрийг төлөхийн тулд ойрын хэдэн өдөрт 75 сая ам. доллар (60.8 сая фунт стерлинг) гадаад валют шаардлагатай байна гэв.  Тэрбээр мөн засгийн газрын ажилчдын цалинг төлөхийн тулд төв банк мөнгө хэвлэх шаардлагатай болсныг онцлов.

Викремесингхэ төрийн өмчит Шри Ланкийн агаарын тээврийн компанийг хувьчилж магадгүй гэж мэдэгдсэн.

Арлын улсын эдийн засаг тахал өвчин, эрчим хүчний үнийн өсөлт, популист татварын бууралт зэрэгт хүндээр туссан. Валютын архаг хомсдол, инфляцийн өсөлт нь эм, шатахуун болон бусад хэрэгцээт зүйлийн хомсдолд хүргэсэн.

Нийслэл Коломбо хотын хамгийн алдартай тээврийн хэрэгсэл болох авто рикша болон бусад машинууд шатахуун түгээх станцуудад дараалал үүсгэжээ.

Ерөнхий сайдаар томилогдсон  Викремесингхе "Одоогийн байдлаар бид ганцхан өдрийн шатахууны нөөцтэй байна. Ирэх хоёр сар бидний амьдралын хамгийн хэцүү сарууд байх болно” гэв.

Гэсэн хэдий ч Энэтхэгтэй зээлийн шугам ашиглан бензин, дизель түлш тээвэрлэх нь ойрын хэдэн хоногт түлшний нийлүүлэлтийг хангах боломжтой гэж тэрбээр нэмж хэлэв. Викремесингхе хэлэхдээ, тус улсын төв банк засгийн газрын цалингийн төсөл болон бусад амлалтуудыг биелүүлэхэд туслахын тулд мөнгө хэвлэх шаардлагатайг онцолж, "Өөрийн хүслийн эсрэг би төрийн албан хаагчдад цалин хөлс олгох, зайлшгүй шаардлагатай бараа, үйлчилгээний төлбөрийг төлөхийн тулд мөнгө хэвлэхийг зөвшөөрч байна. Гэхдээ мөнгө хэвлэх нь рупигийн ханшийг унагахад хүргэдэг гэдгийг санах хэрэгтэй" гэв.

Эх сурвалж: BBC