Уул уурхайн өгөгдөл мэдээллийн ашиглалтыг нэмэгдүүлэх үүднээс иргэд болон төрийн албан хаагчдын цахим боловсрол, ур чадварыг дээшлүүлэх хамтын ажиллагааны санамж бичгийг өнөөдөр /2022.05.14/ байгууллаа. Тодруулбал, олон улсын санхүүгийн корпорац, УУХҮЯ тус санамжийг баталсан байна. Ингэснээр нээлттэй өгөгдлийн ач холбогдлыг төр, хувийн хэвшил, иргэний нийгмийн түвшинд талуудын ойлголтыг нэгтгэх зорилготой аж.

УУХҮ-ийн дэд сайд О.Батнайрамдал:

-Өнөөдрийн арга хэмжээ мэдээллийн тэнцвэргүй байдлыг бууруулахад чиглэж байгаа бөгөөд оролцогч тал бүр ойлголтоо нэгтгэх нь чухал. Уул уурхай бол Монгол Улсын дэлхийд өрсөлдөж буй салбар. Дэлхий дахинд эрдэс баялгийн салбарыг ил тод, хариуцлагатай болгох зорилготой ОҮИТБС нь 50 гаруй улсад хэрэгждэг. Монгол Улс ч энэхүү санаачилгыг сайн хэрэгжүүлдэг тэргүүлэх орнуудын тоонд ордог. 2006 онд элсэн орсноосоо хойш уул уурхайн салбарын маш их мэдээллийг ил тод болгоод байна.

Цаашид энэ их өгөгдлийг ашиглаж, орон нутгийн иргэд, хөрөнгө оруулагчид, шийдвэр гаргагчид гээд оролцогчдын түвшинд ойлгомжтой хүргэж байж ил тод байдал сайжирна. Үүнд уул уурхайн салбар нээлттэй өгөгдөл ашиглалтаараа ч манлайлах нь чухал.

ОУСК-ийн Суурин төлөөлөгч Руфат Алимарданов:

-Уул уурхайн салбарт оруулсан хөрөнгө оруулалтын өгөөжийг оролцогч бүх талууд хүртэхэд туслахын тулд ил тод байдлыг үр дүнтэй хангах, өгөгдөл мэдээллийг ашиглах туршлага чухал юм. Энэ нь ялангуяа ажлын байр шинээр бий болгох, ханган нийлүүлэлтэд орон нутгийн аж ахуйн нэгжүүдийг оролцуулах боломжийг нээх гээд уул уурхайн эерэг нөлөө, түүнчлэн иргэдийн амьжиргаанд нөлөөлж болзошгүй байгаль орчин, нийгмийн эрсдэлийг орон нутаг бодитой ойлгож мэдэх боломжийг олгодог. Энэхүү санаачилгын үр дүнд хөрөнгө оруулагчид, орон нутаг хоорондын харилцан итгэлцэл бэхжиж, Монгол Улсад уул уурхайн салбар тогтвортой, хүртээмжтэй хөгжихөд түлхэц болно” гэж онцоллоо.

ОУСК-ийн “Хөгжлийн төлөө ил тод байдал” хөтөлбөрийн зохицуулагч Б.Дэлгэрмаа:

-ОҮИТБС Монгол Улсад хэрэгжиж эхэлсэн 2006 оноос хойш өнөөдрийг хүртэл уул уурхайн салбарт ил тод байдал хэрхэн сайжирсан талаар оролцогчдод мэдээлэл өглөө. Эрдэс баялгийн салбарт ил тод байдлыг хангах 51 нээлттэй өгөгдлийн сан байгаа юм байна. Эдгээр сангийн ашиглалтыг сайжруулж, мэдээллийн тэгш бус байдлыг арилгахын тулд юуны өмнө хүлээн авагчийн хэрэгцээнд нийцүүлэх, баталгаатай, шиинэлэг байх, нээлттэй өгөгдлийн форматтай байх, ашиглах ур чадвартай байх зэрэг сорилтуудыг даван туулж байж сая нээлттэй өгөгдөл итгэлцлийг бэхжүүлэх үүргээ гүйцэтгэх юм.

Санамж бичгийн хүрээнд орон нутгийн иргэдийн хэрэгцээнд нийцэх өгөгдлүүдийг нээлттэй болгож, чанарыг нь сайжруулах бөгөөд цаашид оролцогч талууд техникийн цуврал уулзалтуудыг хийх юм байна.