"Хуйвалдаанаар наадмын найруулагчийг томилдог нь үнэн"

Баяр наадмын комиссоос Үндэсний их баяр наадмын Ерөнхий найруулагчийг сонгон шалгаруулдаг. Жил жилийн баяр наадмыг хэн найруулах нь олны сонирхлыг татаж, багагүй хэл ам дагуулсаар ирсэн."Энэ жил нийт 19 найруулагчаас хамгийн олон санал авсан уран бүтээлч энэ жилийн наадмыг найруулна" гэж Соёлын яамнаас мэдээлсэн юм.

Эх сурвалжийн мэдээлснээр, Улсын драмын эрдмийн театрын уран бүтээлчид хариуцахаар болжээ.

Тодруулбал, наадмын ерөнхий найруулагчаар Соёлын гавьяат зүтгэлтэн Н.Наранбаатар дөрөв дэх удаагаа ажиллах сурагтай. Өмнөх жилүүдэд Үндэсний их баяр наадмыг найруулсан найруулагчдын төлөөллийн байр суурийг хүргэе.

"НАМ, НАЙЗ НӨХДИЙН ЖУРМААР ХУЙВАЛДАЖ, НААДМЫН НАЙРУУЛАГЧИЙГ ТОМИЛДОГ БОЛСОН"

Монгол Улсын Төрийн соёрхолт, Урлагийн гавьяат зүтгэлтэн, бүжиг дэглээч С.СҮХБААТАР:

-Бид наадмын найруулагчаар ажиллахад татгалзах зүйл байхгүй. Уран бүтээлч өөрийнхөө ур чадвар, авьяасыг үнэлж, төрийнхөө бодлого, ард түмнийхээ зан заншлыг олон түмэнд дэлгэн харуулж чадна. Гэтэл сүүлийн жилүүдэд төсөл хэрэгжүүлэх нэрээр сайныг нь хамж, нам болон найз нөхдийн журмаар хуйвалдааны аргаар наадмын найруулагчийг томилдог болсон нь үнэн. Би Үндэсний их баяр наадмыг анх 5000 уран бүтээлч оролцуулж, найруулан хүргэж байлаа. Гурван удаа наадмын нээлт, хаалтын тоглолтыг найруулсан бол хамтарч нэг удаа ажилласан.

Тийм учраас наадмын найруулагчаар ажиллаж чадах уран бүтээлчдээ цуглуулж, ярилцаад хэрэгтэй санаа оноог нь нэгтгэж хийх нь зүйтэй. Тэгэхгүй хүний авьяасыг насаар, намаар, үзэл суртал, танил тал, нутаг усаар дүгнэж байгаа нь буруу юм.

"БҮХ ЦАГ ҮЕИЙН НААДМААР ПРОПАГАНДА ХИЙЖ ИРСЭН"

Төрийн соёлхолт, Гавьяат жүжигчин Д.СОСОРБАРАМ:

-Миний хувьд 2011, 2012 онд Үндэсний их баяр наадмын нээлт, хаалтын концертод зөвлөх найруулагчаар ажилласан. Харин 2013 онд Төв цэнгэлдэх хүрээлэнд Ерөнхий найруулагчаар ажилласан бол 2014 онд хоёуланг нь найруулсан. Баяр наадмын концертыг найруулахад түүхчилсэн байх шаардлага тавьдаг. Би арай задгай найруулах гээд бардаггүй юм. Тэр сэдвээр нь хийхгүй бол зөвшөөрдөггүй.

Энэ жилийн хувьд Ардын хувьсгалын 101 жилийн ойн баяр наадмыг 100 жилийн ойтой хамтатгаж буй. Өнөө л пропагандагаа хийх гээд. Бүх цаг үед л тийм байсан. Залуу уран бүтээлчид дунд чадварлаг найруулагч байгаа байлгүй дээ.

"ҮНДЭСНИЙ ИХ БАЯР НААДМЫН НЭЭЛТ, ХААЛТЫН КОНЦЕРТ БОЛ ҮНДЭСНИЙ БАХАРХАЛ"

Хөгжмийн зохиолч, хөгжим судлаач Н.ЖАНЦАННОРОВ:

-Миний хувьд Үндэсний их баяр наадмын нээлт, хаалт бол монголчууд бидний үндэсний бахархал, орь хүслэнг уран сайхны аргаар илэрхийлсэн үзүүлбэр, хүндэтгэлийн концерт нь бүтэн нэг жилийн хугацаанд гарсан урлагийн бүтээлийн ололт, шинэ гарч ирж буй их авьяастныг танилцуулах, хуучин томоохон уран бүтээлчдийн чадварыг гайхуулахад чиглэсэн бүтээл байх ёстой гэж ухаардаг. Төр ёсны талаасаа авч үзвэл, манай төрийн тэргүүний зүгээс урлагаар дамжуулан иргэддээ барьж байгаа оюун соёлын баярын бэлэг юм шүү. Наадмын нээлтийг найруулах их төвөгтэй. Өдрийн гэрэлд орчин цагийн техник технологи тааруу болохоор олигтой юм хийхэд бэрхшээлтэй. Шөнө бол гэрэл сүүдрээр "хуурч "болдог. Их олон хүнээр "зодвол" арай дээр. Гэвч манайд тийм олон урлагийн мэргэжлийн хүн байхгүй болохоор хэдэн цэрэгт туг далбаа бариулж гүйлгэх арга хайдаг. Том талбайд цөөхөн хүн, юу ч харагддаггүй. Наадмын найруулагчийн хувьд одоохондоо Н.Наранбаатар арай багцаатай байх. Яагаад гэвэл театрын мэргэшсэн найруулагч олон хүн зохион байгуулах, тэднийг эмх цэгцтэй хөдөлгөөнд оруулах, дуу хөгжмөө олж сонгох, хамгийн гол нь орон зайг илүү мэдрэх олсон зохиомж сэдвээ боловсруулахдаа бусдаас давуу байдаг.

ӨНГӨРСӨН ЖИЛИЙН НААДМЫН ЦАХИМ КОНЦЕРТЫГ 850 САЯ ТӨГРӨГӨӨР БҮТЭЭСЭН

Өнгөрсөн жилийн наадмын цахим концертыг 850 сая төгрөгөөр бүтээсэн. Энэ нь урьд жилүүдийнхээс 250 сая төгрөгөөр илүү байв. Гэтэл энэ их мөнгийг хэрхэн зарцуулсан нь олон нийтэд тодорхой бус. Наадмын цахим концертыг Ерөнхий сайдын төрсөн ах Б.Баатар найруулсан. Энэ нь иргэдийн шүүмжлэл дагуулж, Б.Баатар үнэ хөлсгүй найруулснаа дуулгасан.

Тэрбээр “Эхнээсээ наадмын нээлтийн зураг авалт хийж байтал долдугаар сарын 2-нд наадмыг нэг жилээр хойшлуулах Засгийн газрын шийдвэр гарсан. Тиймээс наадмын нээлт биш, баярын концерт болгон хөтөлбөрөө үндсэндээ өөрчилсөн. Мөн “Херо энертайнмент"-ын хувьцаа эзэмшигч нь Засгийн газарт ажилладаг тул 2020, 2021 оны наадмуудад миний бие үнэ төлбөргүй ажилласан болохыг хариуцлагатай мэдэгдье” гэж тайлбар хийсэн байдаг.