Загвар өмсөгч Хейли Бибер амьдралынхаа хамгийн аймшигтай үеийн талаар дэлгэрэнгүй ярьжээ. Тэрбээр өнгөрсөн гуравдугаар сард тархины харвалтын шинж тэмдгээр яаралтай эмнэлэгт хүргэгдсэн аж.

Хейли Бибер ярихдаа “Гуравдугаар сарын 10-нд бусад энгийн өдрүүд шиг нөхөртэйгөө хамт суугаад, өглөөний цайгаа ууж байсан. Гэтэл би гэнэт мөрнөөс гарын хурууны үзүүр хүртэл сонин зүйл мэдэрсэн. Удалгүй хуруунууд мэдээгүй болж, хачин мэдрэмж төрсөн. Тухайн үед Жастин надаас “Чи зүгээр үү? гэж олон давтаж асуусан ч би хариулж чадахгүй байсан. Удалгүй миний нүүрний баруун хэсэг унжиж эхэлсэн. Би ганц ч үг дугарч чадахгүй байсан бөгөөд толгойд маш олон бодол эргэлдсэн. Би маш их айж, юу болоод байгаа, цаашид яахаа мэдэхгүй, үүрд ийм байдалтай үлдэх үү гэдэгт санаа зовж байсан” гэжээ.

Түргэн тусламжийн машин ирэхэд Хейли өөрөө алхаад суух чадвартай байсан ч үг хэлж чадахгүй хэвээр байж. Эмнэлэгт хүргэгдсэний дараа эмч, сувилагчид түүний насыг мэдэхгүй, 30-тай эмэгтэй гэж ярьж байхыг сонсоод Хейли үг хэлж чадахгүй ч дотроо инээд нь хүрч байсан аж. Тэрбээр өдгөө 25 настай юм.

Биед үүссэн цусны бүлэн тархинд очиж судасны бөглөрөл үүсгэснээс жижиг харвалт өгсөн гэж эмч нар тодорхойлсон байна. Энэ тохиолдолд биед мэдээ алдах, хүч сулрах, ярьж чадахгүй болох, толгой эргэх, тэнцвэрээ алдах, явж чадахгүй болох шинж тэмдэг илэрдэг аж.

Бүлэгнэсэн цус азаар зүрхэнд шигдээс үүсгэлгүй тархи хүртэл “аялсан” байсан гэж Хейли ярьжээ. Бие нь сайжирч эмнэлгээс гарсныхаа дараа тэрбээр яагаад цусны бүлэн үүссэнийг тогтоохоор шинжилгээ хийлгэсэн байна.

Хейли эмч нарт саяхан жирэмслэлтээс хамгаалах эм ууж эхэлснээс хойш толгой нь өвдөх болсон талаар хэлжээ. Харин эмч нар нисэх онгоцоор маш олон давтамжтай ниссэн, хэт бариу оймс өмссөн, саяхан Covid-19 туссан зэрэг маш олон хүчин зүйл цусны бүлэн үүсгэх магадлалтайг тайлбарласан байна. Жастин Бибер Covid-19 туссанаас хойш 21 хоногийн дараа Хейли өвджээ.

Гэхдээ шинжилгээний явцад Хейли зүрхний цоорхойтой нь тогтоогдож, улмаар яаралтай хагалгаа хийлгэсэн байна.

Эх сурвалж: E NEWS