Шадар сайд С.Амарсайхан фейсбүүкт пост бичсэн иргэнийг Мөрдөн байцаах газраар шалгуулахаар өргөдөл өгсөн талаар иргэн Т.Шинэбаяр  мэдээлэл хийлээ.

Тэрбээр "Шадар сайд С.Амарсайхан энэ сарын 19-нд миний нэр дээр дуудах хуудас ирүүлсэн. Гэхдээ надад өөрт биш ээжид маань хуудсыг хүргүүлсэн байсан. Даваа гарагт нь дуудах хуудсын дагуу очиж уулзахад фейсбүүкийн бичвэрээс болж Шадар сайд гомдсон байсан. Өргөдөлдөө дараах бичвэрүүдэд гомдсон хэмээн бичсэн байжээ.

1. Хийн хоолойн асуудлыг эсэргүүцэж байгаад
2. Туулын бургасыг хядсаныг нь эсэргүүцсэнд
3. Цар тахлын хүнд үед усан оргилуурыг 3,2 тэрбум төгрөгөөр барьсныг шүүмжилсэнд
4. Засгийн газрын үйл ажиллагааг шүүмжилсэнд
5. "Аав нь шарил ухдаг хятад хүн байсан гэсэн. Хүү нь Монгол Улсыг самарч байна" гэх агуулгатай бичвэр оруулсанд тус тус гомдсон байсан.

Монгол Улсын Үндсэн хуулийн дагуу иргэн өөрийн үзэл бодлоо илэрхийлэх бүрэн эрхтэй. Гэтэл үзэл бодлоо илэрхийлсний төлөө эрүүгийн хариуцлага хүлээлгэх гомдлыг хүргүүлжээ. Энэ асуудал нь эхлээд над дээр хэрэгжээд эрүүгийн хуулиар ял оногдуулчих юм бол дараа дараагийн энгийн ард иргэд, эмэгтэйчүүдийн дууг нь хорих үйл ажиллагааг эхлүүлэх гэж байна хэмээн хардаж байна. Би дээрх таван зүйлсийг эсэргүүцдэг, эсэргүүцсээр ч байх болно.

1. ОХУ-аас манай улсаас дамжин өнгөрөх хийн хоолой манайд ямар ч ашиггүй. Нэг тэрбум ам.доллар оруулж ирэх гэж байхад иргэн Шинэбаяр эсэргүүцээд байна хэмээн гомджээ.
2. Туул голын бургас сүйтгэсэн асуудлын тухайд 14 мянган багц бургасыг хядсан нь тухайн үед шуугиан тарьж байв. Тухайн компани нь Шадар сайдын төрсөн ахынх бөгөөд үйл ажиллагааг нь сэргээж байгаа нь хар  төрүүлж байна.
3. Цар тахлын үеэр эмнэлэг олдохгүй иргэд маш хэцүү байдалд байсан. Залуус нь ихэвчлэн гэрээр эмчлүүлж, зарим нь гэртээ нас барж байсан. Энэ үеэр ус зөөж дүүргэдэг усан оргилуурыг 3,2 тэрбум төгрөгөөр барьсан.
4. Өргөдөлдөө Засгийн газрын үйл ажиллагааг шүүмжилсэн хэмээжээ. Шүүмжлэхээс өөр аргагүй байна. Тэр хүн ажлаа сайн хийж байсан бол сошиал сүлжээнд "цагдаа" хийгээд суухгүй, хил гаалийн асуудлаа шийдэх байсан. Зүгээр хараад суухаар бид яаж ядуурлаас гарах вэ. Сошиалд өөрийнх нь тухай бичсэнийг тандаад сууж байхын оронд нүүрсээ нарийн царигаар хэрхэн гаргах асуудлыг авч үзээсэй. Ерөнхий сайд, Засгийн газрын үйл ажиллагааг шүүмжлэхэд яагаад Шадар сайд гомддог юм бэ?

Шүүхдээ итгэмээр байвч хараат бус шүүгч ховор байгаа болов уу гэж эргэлзэж хуулийн байгууллагад итгэл төгс биш байна. Шадар сайдыг огцруулах шаардлага тавина. Мөн Монгол Улсад ажиллаж байгаа гаднын Элчин сайд нарт хандаж түүнд хилийн хориг тавихыг хүсэх болно" гэв.

Б.ТУЯА