Тайпэйн худалдаа, эдийн засгийн Улаанбаатар дахь төлөөлөгчийн газар "Taiwan in Mongolia", Тайжун хотын захиргаа болон "Монгол Арт" галерей хамтран толилуулж буй тус үзэсгэлэн энэ сарын 9-19 нийг хүртэл арт галерейн хоёр давхрын үзэсгэлэнгийн танхимд дэлгэгдэж байна.

Үзэсгэлэнд Монгол Улсаас шалгарсан найман уран бүтээлчдийн шилдэг бүтээлүүд болон Тайжун хотын захиргаанаас “Да Дун дүрслэх урлагийн үзэсгэлэн ”-гийн гранпри шагнал болох “Да Дуны дүрслэх урлагийн шагнал”-ыг хүртсэн хоёр бүтээл үзэсгэлэнд оролцож байна.

Тайжун хотын “Да Дун дүрслэх урлагийн үзэсгэлэн ”-д сүүлийн жилүүдэд Монголын уран бүтээлчид идэвхтэй оролцож байгаа бөгөөд оролцсон хүний тоо болон шагнал хүртсэн хүний тоогоороо олон улсын шилдэг гурван оролцогч багийн нэг болсон.

Ялангуяа өнгөрсөн жил 115 олон улсын бүтээлээс 43 бүтээлийг Монголын уран бүтээлчид ирүүлсэн юм. Олон улсын уран бүтээлчдийн 18 бүтээл нэгдүгээр шатанд шалгарснаас найм нь Монгол уран бүтээлчдийн уран бүтээл байсан.

Уралдааны финалын шатанд уг найман уран бүтээлээс гурав нь шалгарчээ.

Хамтарсан үзэсгэлэнд өнгөрсөн жил “Да Дун дүрслэх урлагийн үзэсгэлэн ”-д нэгдүгээр шатанд Монголоос шалгарсан найман уран бүтээлчдийн тус бүр шилдэг гурван бүтээлүүд болон Тайваниас шалгарсан хоёр уран бүтээлчийн шилдэг бүтээлүүд гээд нийт 26 бүтээл дэлгэж байна.

Бүтээлүүд нь өргөн цар хүрээг хамрах бөгөөд тосон будаг, анимэйшн, усан будаг, уран баримал, арьсан урлал, керамик урлал, мод металл урлал гэх мэт төрлүүд оролцож байна.