Хотын төвийн А бүсэд байрлах дөрвөн давхар саарал байр бол Монголын залуучуудын холбооных. Тус байранд залуус цуглахаас биш түрээсийн газар,  үйлчилгээний байгууллага болж хувирчээ.

Үүдээр нь ормогц лоунж, ресторан, жолооны курс нотариат байрлах аж. Нэг давхрынхаа ханан дээр Монголын залуучуудын холбоо гэж томоос том хаяг хадаж, доор нь "Үлдэх мөртэй залуу нас" гэж бичсэн харагдав.

Урт нарийхан коридороор алхахад  элдэв янзын байгууллагуудын хаяг эрээлжлэнэ. Захын хамгийн мухрын өрөөнд Залуучуудын хөдөлмөр эрхлэх төв байрладаг  юм байна.

Хоёр давхарт нь МЗХ-ныхон гэх МАН-ын "цүнх" баригч залуучууд байрладаг аж. МАН-ын гэж тодорхойлж буйн учир нь  тус холбооны ерөнхийлөгчөөр О.Гэрэлт-Од дэд ерөнхийлөгчөөр УИХ-ын гишүүн асан Д.Гантулга нар хоёулаа тус намын гишүүд. Өөрөөр хэлбэл МАН-аас угшилтай залуус тус холбоог өнөөдөр удирдаж байна. Тэдгээр дарга нарын өрөө цоожтой, хүн хар ч багатай байлаа.

Дөрвөн давхар тус байрны хоёр давхараас  бусад давхрууд тэр чигтээ түрээслэгчдээр дүүрчээ.  Хоёр давхрын шилэн хоргонд үе үеийн удирдлагуудын зургийг өлгөн тавьсан ч энд залуус харагдсангүй.

Хэсэг хүлээсний эцэст хоёр давхарт байрлах гадаад хэлний сургалтын төвүүд рүү сурагч, оюутнууд ганц нэгээр орно. Харин гурван давхарт сайт, өмгөөлөгч, мото спортын төв, хуулийн зөвлөгөө өгөх өрөөнүүдтэй. Дөрөвдүгээр давхрын ихэнх өрөө цоожтой.

МЗХ САРД 109 САЯ ТӨГРӨГИЙГ ТҮРЭЭСЭЭС ОЛДОГ

Эндхийн түрээслэгчдийн хэлснээр цар тахлын өмнө нь түрээсийн төлбөр мкв нь 27 мянган төгрөг байсан бол  энэ жилээс нэмэгдэж 35 мянган төгрөг болсон гэв. Лоунжоор ороход хүн бараг байсангүй. Тус газрын захирал лоунж босгохын тулд 200 сая төгрөгийг зарцуулсан гэдгээ нуусангүй. Сүүлийн үед тус холбооны байрыг хүүхдийн эмнэлэг болгох санал сошиалаар нэлээд явсан. Уг асуудлыг түрээслэгчид төдийлөн дэмжихгүй байгаа гэдгээ хэлж байв.

Харин тус холбоонд нийт хэчнээн аж ахуй нэгж түрээсээр үйл ажиллагаа явуулдаг нь тодорхойгүй байна. Энэ талаар тус холбооныхноос нягтлахад "Түр гараад явсан" гэх шалтгаанаар мэдээлэл өгөхөөс татгалзлаа. МЗХ-ны байр 3125 мкв талбайтай. Өөрөөр хэлбэл үүнийг түрээсийн төлбөрөөр тооцож үзвэл сардаа 109.375.000 төгрөгийн ашигтай ажилладаг юм байна.

МЗХ-НЫ УДИРДЛАГЫГ ШАЛГАНА

Тус холбооны байранд лоунж, ресторан үйл ажиллагаа явуулдаг гэх шүүмжлэлийн дагуу Ерөнхий сайд Л.Оюун-Эрдэнэ өнгөрөгч долоо хоногт "Залуучуудын байрны асуудал ТББ-ынх учраас Засгийн газар шууд оролцох боломжгүй. Гэхдээ би энэ асуудлыг өмнө нь ч хөндөж байсан. МЗХ гэдэг байгууллага, үе үеийн удирдлагууд нь олон нийтийн эзэмшлийг шамшигдуулсан байна уу гэдгийг АТГ-т шилжүүлсэн" гэх мэдээллийг өгсөн. Тэгвэл өчигдрийн Засгийн газрын хуралдаанаар уг асуудлыг хэлэлцжээ. Улмаар Монголын залуучуудын холбооны удирдлагуудыг хуулийн байгууллагаар шалгуулах чиглэл өгсөн байна. Учир нь тус байрыг хууль бусаар ашигласан байж болзошгүй нөхцөл байдал тогтоогдсон талаар эх сурвалж мэдээлж байна.

"МЗХ ЗАЛУУЧУУДАД ЗОРИУЛСАН ҮЙЛ АЖИЛЛАГАА ЯВУУЛДАГГҮЙ"

Залуучуудын холбоонд үйл ажиллагаа явуулдаг түрээслэгч болон, үйлчлүүлж буй иргэдийн байр суурийг сонслоо.

Иргэн Б.Дамдин:

-Миний хувьд энэ байранд түрээсийн үйл ажиллагаа эрхэлдэг. Үндсэн МЗХ-ны үйл ажиллагаа сайн явдаггүй байх гэж бодож байна. Хоёр жил энд үйл ажиллагаа эрхэлж байна. Тэр хугацаанд Ерөнхийлөгчийн зарлигийн дагуу архи асгаж, сүртэй хэвлэлийн хурал хийснээс өөрөөр залуучуудыг хамарсан, мотивацжуулах, залууст чиглэсэн арга хэмжээ явдаггүй. Гэхдээ эмнэлэг хүрэлцээгүй учраас МЗХ-г шууд эмнэлэг болгоё гээд байх нь бас хаашаа юм. Холбооны байрыг эмнэлэг болгох гэхээс илүү ажлыг нь сайн хийлгэх тал дээр анхаарвал яадаг юм бэ. Түрээс сая нэмэгдчихсэн. Өмнө мвк нь 27 мянга байсан бол одоо 35 мянга болчихсон. Энэ газарт сүртэй хэвлэлийн хурал хийж, дарга цэргийн төлөөх тэмцэл болдог гэж сонсч байсан.

Н.Чулуунхүү:

-Залуучууд үйл ажиллагаа явуулдаг өөрийн гэсэн байртай байх ёстой. Залуучууд дуу хоолойгоо хүргэх ёстой. Залуучуудад чиглэсэн зүйл алга. Гэтэл энд янз бүрийн түрээсийн газрууд байдаг юм байна.

Э.Мэндсайхан:

-МЗХ-г эмнэлэг болгосон нь зөв. Залуучуудын холбоог яг юу хийдгийг ч мэдэхгүй байна. Ер нь үйлчлүүлж үзээгүй. Энд нотариат орох гэж үйлчлүүлж байна. Орж ирэхэд лоунж, авто сургууль байна. Өөрөөр хэлбэл холбоо нэртэй үйлчилгээний байгууллага байх шиг байна. Залуучуудад зориулсан байр гэхэд гайхлаа. Юу хийдгийг нь мэдэхгүй. Хүүхдийн өвчлөл их байхад эмнэлэг болгож шийдээд өгчихвөл зүгээр байх.

МЗХ ТҮРЭЭСИЙН ТӨЛБӨРӨӨР АЖИЛЧДЫНХАА ЦАЛИНГ ТАВЬДАГ

МЗХ-ны ерөнхийлөгч О.Гэрэлт-Одоос байрны асуудлаар нь тодруулга авсан.

-МЗХ-г хүүхдийн эмнэлэг болгох саналыг залуус гаргасан. Хүүхдийн эмнэлэг болгохыг та бүхэн дэмжих үү? 

-МЗХ-ны байр бол Монголын хувьсгалт залуучуудын нийгэмлэгийн ахмад ажилтнууд 1964 онд барьж, ашиглалтад оруулсан. Эвлэлийн ахмадууд өөрсдөө хөрөнгө мөнгө цуглуулж, өөрсдийн гараар барьсан барилга юм. Мөн социалист орны дэмжлэгтэйгээр баригдсан. Сошиал орчинд МЗХ-ны байрыг эмнэлэг болгоё гэдэг асуудлыг харсан. Энэтэй холбоотой энэ сарын 5-ны өдөр МХЕГ-т бичиг өгсөн. Тухайлбал, хүүхдийн эмнэлгийн зориулалтаар ашиглах боломжтой эсэхэд дүгнэлт гаргаж өгөөч гэдэг хүсэлт гаргасан. МХЕГ-аас дүгнэлт нь гарах байх. Хэрвээ хүүхдийн эмнэлэг болгож ашиглах болбол бид нэг давхартаа байрлаж бусад гурван давхрыг хүүхдийн эмнэлгийн зориулалтаар ашиглуулах боломжтой. Татгалзах зүйл байхгүй.

-Засгийн газраас МЗХ-г шалгах чиглэл гаргалаа.  Энэ талаар та бүхэнд ямар мэдээлэлтэй байна вэ. Үе үеийн удирдлагууд холбоо нэрийн дор түрээсийн төлбөрөөр мөнгө олдог талаар эх сурвалжууд мэдээлж байгаа. Үүнд хариулт өгөхгүй юу?

-Засгийн газраас биднийг шалгах шийдвэр гарсан бол дэмжинэ. Холбогдох материалаа өгөөд шалгуулахад бэлэн.

-Залуудчуудын холбооны байранд залууст чиглэсэн үйл ажиллагаа төдийлөн харагдахгүй байна. Үүдэнд лоунж, авто сургууль, нотариат зэрэг түрээслэгчид харагдаж байна. Яагаад залуустаа зориулсан үйл ажиллагаа явуулахгүй байгаа юм бэ. Нийт хэнчээн түрээслэгч байна вэ?

-Энэ дөрвөн давхар  барилга маш их урсгал зардал гардаг. Дээрээс нь энэ байгууллагад ажилдаг үйлчлэгч, цахилгаанчин гэх мэт ажилчид бий. Тэр хүмүүсийн цалинг түрээснээс гаргаж өгдөг. Мөн ашиглалтын зардлыг түрээснээс гаргадаг. Нэг давхарт залуучуудын хөдөлмөр эрхлэх төв байгуулсан. Өмнө нь нэг давхарт хөдөлмөрийн бирж ажилладаг байсан. Миний бие ажлаа аваад үүнийг дахин сэргээсэн. МЗХ-ны байр залуусын идэвх оролцоог нэмэгдүүлэх чиглэлээр боломжтой бүхий л чадлаараа ажиллуулаад явж байна.

-МХЕГ-аас та бүхний хүсэлтийг хүлээж аваад хүүхдийн эмнэлэг болголоо гэвэл түрээслэгчид яах вэ?

-Түрээслэгчидтэй тохиролцоод чөлөөлөх бүрэн боломжтой.

ЗАЛУУЧУУДЫН ХОЛБОО ЗОРИЛГЫНХОО ДАГУУ АЖИЛЛАХ ЁСТОЙ

МЗХ залуусаа дэмжсэн, залуучууд чөлөөт цагаа өнгөрүүлэх, тэднийг хөгжүүлэх гол байгууллага байх ёстой байлаа. Гэтэл бодит байдалд түрээслэгчдээс мөнгө олсон ашгийн байгууллага болж хувирчээ. Үүнээс гадна тус байгууллагын удирдлагууд архинаас татгалзахыг уриалж, 2000 шил архийг төв талбай дээр асгана хэмээн "попроод" амжсан. Гэтэл залууст өнөөдөр чөлөөт цагаа зөв зохистой өнгөрүүлэх газар цөөн байдаг. Кино театр, бар, лоунж, тоглоомын газар зэргээс бусдаар залууст зориулсан шөнийн номын сан, хөдөлмөрийн бирж даанч манай улсад хомс байна. Иймээс Монголын залуучуудын холбоо нэртэй түрээслэгчдээр дүүрсэн газрыг эмнэлэг болгох бус  залууст  сурч боловсрох, чөлөөт цагаа өнгөрүүлэх төв, номын сан, инноваци, технологийн төв болгон өөрчилбөл  нүдээ олсон шийдвэр байх болов уу.

МЗХ 2 ХУУЛИЙН ЭТГЭЭДИЙН БҮРТГЭЛТЭЙ БАЙДАГ

Монголын залуучуудын холбоо хоёр тусдаа хуулийн этгээдийн бүртгэлтэй. Тодруулбал, Улсын бүртгэлийн ерөнхий газарт тус холбооны ерөнхийлөгч О.Гэрэлт-Од болон, “Залуучуудын үнэн сонин” гэсэн бүртгэлтэй байна.

Залуучуудын үнэн сонины эрхлэгчээр Б.Оюунчимэг гэх иргэн бүртгэлтэй байх бөгөөд 2011 оны дөрөвдүгээр сарын 15-ны өдөр бүртгэжээ.

Үйл ажиллагааны чиглэлдээ “ажил, үйлсээрээ хошуучлагч залуусын тухай сурвалжлага, ярилцлага, залуучуудын байгууллагын үйл ажиллагаа болон танин мэдэхүйн мэдээ мэдээллийг хэвлэн нийтлэх” гэжээ. Харин Монголын залуучуудын холбоо НҮТББ нь 2011 оны хоёрдугаар сарын 9-ний өдөр бүртгүүлжээ. Ингэхдээ хувьцаа эзэмшигч гишүүний мэдээлэлд О.Гэрэлт-Одыг 2020 оны аравдугаар сарын 23-ны өдөр бүртгэсэн байна. Үйл ажиллагааны чиглэлдээ “Залуучуудад бүтээлчээр ажиллаж, амьдрах, шинийг санаачлах хүмүүжил олоход нь туслах, дэмжих, уламжлалт түүх соёл, ёс заншлыг өвлүүлэн үлдээх” гэсэн байна.

Гэрэл зургийг Б.ЭРДЭНЭБИЛГҮҮН