"Харанга" хамтлаг тоглолтоо хийнэ

Монголын рок поп хөгжмийн домог болсон “Харанга” хамтлаг ирэх тавдугаар сарын 13, 14-нд “Legendary HARANGA: Greatest hits” тоглолтоо “UB palace”-ын концертын их танхимд хийхээр төлөвлөжээ. Энэ удаагийн тоглолтод 33 жилийн турш туурвисан уран бүтээлүүдээсээ шилж, бүх цаг үеийн хит 25 дууг хүргэх гэнэ.

Тэдний 30 жилийн ойд зориулсан “Замд гаръя” тоглолт 2019 оны аравдугаар сарын 19-нд “Буянт-Ухаа” спорт цогцолцорт бүтэн найман цаг үргэлжилж, шилдэг 30 уран бүтээлээ эгшиглүүлж байв.

"Харанга"-ынхан Гавьяат жүжигчин, Урлагийн гавьяат зүтгэлтэн цол хүртэж, хамтлагаараа Төрийн соёрхолт цол хүртсэн анхны бөгөөд цор ганц хамтлаг юм.

Гитар хөгжим эвлэгхэн тоглочихдог Ц.Энхманлай, Я.Одсүрэн нарын нөхөрлөл “Харанга” хамтлагийн эхлэл байсан гэдэг. Хамтлагийн гишүүд анх 1977 онд Ардын армид татагдан танилцаж, "Соёмбо" хамтлагт хамтдаа тоглох болсон байна. Үүнээс хойш 10 гаруй жилийн дараа 1989 онд Драмын театрын дэргэд "Харанга" хамтлагийг байгуулсан түүхтэй. "Харанга" хамтлагийн талаарх сонирхолтой мэдээллийг эндээс уншина уу.