Дэлхийн ямар ч улсын тэргүүн, сайд, өндөр албан тушаалтан тансаг зэрэглэлийн автомашин хөлөглөж, хамгаалалтын албаар "хашуулан" энгийн иргэдэд түгжрэл үүсгэх дуртай. Африкийн нэн ядуу улсын Ерөнхийлөгч хүртэл улсын төсвөөр үнэтэй машин худалдан авч, засмал дээр цуваа үүсгэх сонирхолтой байдаг. Чухам улсын тэргүүн гэдэг утгаараа дэлхий нийтэд сүртэй, чинээлэг, хүчирхэг харагдах ёстой мэт үзэл суртал оршдог болов уу.

Эсрэгээрээ  дэлхийн зарим алдартай удирдагчид унадаг дугуйгаар өдөр тутмын ажлаа гүйцэтгэдэг байна. Унадаг дугуй жийдэг эдгээр улстөрч эрхмүүд дэлхийн дулаарлыг үүсгэж буй нүүрстөрөгчийн ялгаруулалт бууруулахад хувь нэмрээ оруулахын тулд машин унахаа больсон гэж тайлбарладаг.

Дэлхийн нүүрсхүчлийн хийн ялгарлын бараг 25 хувийг моторжуулсан тээврийн хэрэгслээс ялгарах утаа  эзэлдэг. Мөн  хот, тосгоны хүмүүсийн  80 хувь нь хувийн тээврийн хэрэгслээр зорчихдоо утаа их ялгаруулдаг моторт тээврийн хэрэгслийг сонгодог аж.

Унадаг дугуй ашиглах болсон шалтгаан нь эрүүл мэндийн асуудалтай холбогдох удирдагчид ч бий. Үнэндээ дугуй унах нь эрүүл мэндэд тустай. Жишээлбэл, зүрх судасны болон аэробикийн фитнессийг сайжруулж, цусны даралтыг бууруулж, эрч хүчийг нэмэгдүүлж, булчинг бэхжүүлж, зохицуулалтыг сайжруулдаг. Элдэв шалтгаанаас үл хамааран хамгийн даруухан тээврийн хэрэгслээр зорчиж буй улстөрчийг харах нь үргэлж сэтгэл хөдөлгөм дүр төрх юм.

Эх сурвалж: AutoJosh