УИХ-ын Тамгын газрын Гадаад харилцааны хэлтсийн зөвлөх Ц.Жаргалсайханд холбогдох шүүх хурал өнөөдөр Чингэлтэй дүүргийн шүүхэд боллоо. Шүүх хуралд шүүгчдээс гадна  улсын яллагч Ё.Сагсай өмгөөлөгч С.Жанцан нар оролцож  шүүх бүрэлдэхүүн 11.30 цагаас хаалттай хэлэлцсэн юм. Ц.Жаргалсайханыг улсын нууц задруулсан гэх хэргээр  Эрүүгийн хуулийн тусгай ангийн 87.1-ээр зүйлчлэн өнгөрөгч зургадугаар сарын 15-ны өдрөөс Тагнуулын ерөнхий газраас  шалгаж эхэлсэн. Эл хэр¬гийг  нийслэлийн Прокурорын газрын  хяналтын прокурор Ё.Сагсай хянаад Чингэлтэй дүүргийн шүүхэд шилжүүлсэн. Сэжигтнээр татагдаад байгаа Ц.Жаргалсайхан нь  УИХ-ын даргын ОХУ руу  айлчлахтай  холбоотой баримт материалыг цахим шуудангаар БНХАУ-ын нэр бүхий албан тушаалтанд илгээсэн гэх хэрэгт буруутгагдан шалгагдаж байгаа. Эл хэрэгт Ц.Жаргалсайхантай хамт УИХ-ын гадаад харилцааны хэлтсийн ОХУ-ыг хариуцсан хоёрдугаар нарийн бичгийн дарга Б.Болор, БНХАУ-ын талыг хариуцсан мэргэжилтэн  Г.Байгалмаа нарыг холбогдуулан шалгасан билээ. Уг хэрэгт Б.Болор, Г.Байгальмаа нар холбогдолгүй болох нь нотлогдсон тул хэргийг гэмт хэргийн бүрэлдэхүүнгүй гэж хэрэгсэхгүй болгосон юм. 

Ингээд  ТЕГ-аас улсын  нууц задруулсан гэх хэрэгт Ц.Жаргалсайханыг 87.1-ээр зүйлчлэн хэрэг үүсгэн шалгаж байсан бол  хууль хяналтаас хэрэг хянах явцад зүйл анги өөрчлөгдөж   79.1-ээр зүйлчлэн яллах дүгнэлт үйлдүүлэхээр шүүхэд шилжүүлсэн байна.  Дээрх зүйл ангид зааснаар  “Улсын нууцад хамаарах баримт бичгийг гадаадын улс орон болон тусгай  тагнуулын албанд дамжуулсан бол 16-25 жил хүртэл хорих ялаар шийтгэнэ”  хэмээн заасан байдаг.  Эх сурвалжийн мэдээлснээр түүний зүйл анги өөрчлөгдөх болсон нь  Ц.Жаргалсайханы  нууц задруулсан гэх үйлдэл нь нэг удаагийнх биш бололтой. Тэрбээр ТЕГ-т шалгуулах явцдаа  “Би улсын нууц задруулаагүй, тэдгээр  баримт бичгийг нууцын зэрэглэлд хамаардаг гэдгийг мэдээгүй” гэж мэдүүлэг өгч байжээ. Мөн  дуулиан тарьсан  уг хэргийн талаар хэдхэн хоногийн өмнө буюу наймдугаар сарын 12-ны өдөр хяналтын прокурор   Ё.Сагсайгаас тодруулахад “Улсын нууцтай холбоотой учраас  мэдээлэл өгөх боломжгүй. Уг хэрэгт  Б.Болор, Г.Байгальмаа нарыг шалгах үед гэмт хэрэгт холбогдолгүй болох нь тогтоогдож  хэрэгсэхгүй болгосон” гэсэн тайлбар өгсөн юм.  Чингэлтэй дүүргийн шүүхээс энэ хэргийг хэлэлцээд холбогдогч Ц.Жаргалсайханд Эрүүгийн хуулийн 79.1-ээр зүйлчлэлийн дагуу “Улсын нууц задруулсан, эх орноосоо урвасан, гадаадын тагнуулын байгууллагад мэдээлэл өгсөн”  хэмээн чанга дэглэмтэй хорих ангид 17 жил хорих ял эдлүүлэхээр шийдвэрлэлээ.