Улаанбаатар хотын гурван дүүргийн гэр хорооллын тодорхой хэсгийн айл өрхүүдэд үртсэн түлш хэрэглүүлэх, Мянганы сорилын сангийн төслөөр олгох шинэ зуухаар хангах, цахилгаан халаагуур тавих зэргээр утааг багасгах, хотод  агаарын бохирдол нэмж үүсгэхгүй байх зорилгоор шинээр баригдах эрчим хүчний эх үүсвэрийг Багануур дүүрэгт байгуулах, Туул голыг хамгаалах хүрээнд “Харгиа” цэвэрлэх байгууламжид хийх  шинэчлэлийг түргэтгэх зэрэг асуудлаар Нийслэл хотын холбогдох албаныхан болон  Байгаль орчны яамныхан ярилцаж нэгдсэн шийдэлд хүрчээ.

УИХ-аар баталсан “Шинэ бүтээн байгуулалт“ дунд хугацааны зорилтот хөтөлбөрийг хэрэгжүүлэх хүрээнд ийнхүү Нийслэлийн Засаг дарга бөгөөд Улаанбаатар хотын Захирагч Г.Мөнхбаяр, Байгаль орчин, аялал жуулчлалын сайд Б.Гансүх нар ажлын уулзалт хийж асуудлуудыг шийдвэрлэсэн байна. Уулзалтад нийслэл, яамны холбогдох мэргэжлийнхэн болон Засаг даргын орлогч, хэлтэс, агентлагийн дарга нар оролцож хотоос боловсруулан УИХ-д оруулсан “Утаагүй Улаанбаатар “ төслийн нэр өөрчлөгдсөн ч дотооод асуудлууд бүрэн тусгагдсан энэ хөтөлбөрийг хэрхэн бодит ажил болгох, эхний ээлжинд ямар асуудлыг шийдвэрлэх талаар ярилцаж, хэрэгжүүлэх ажилдаа орохоор боллоо гэж Нийслэлийн Хэвлэл мэдээллийн албанаас мэдээллээ.

Д.Цэцэн