ОХУ-ын ерөнхийлөгч Владимир Путин өчигдөр байгалийн хийн экспортын төлбөр тооцоог зөвхөн рублиэр хийх зарлигт гарын үсэг зуржээ. Энэхүү зарлиг өнөөдрөөс /2022.4.1/ хүчин төгөлдөр үйлчилж эхэлж байгаа аж.

Путин үндэсний телевизээр “ОХУ-аас байгалийн хий худалдан авагчид Орос данс нээж, зөвхөн рублиэр төлбөр тооцоо хийх хэрэгтэй. Эс бөгөөс бүх гэрээ хэлэлцээг зогсооно” гэж мэдэгджээ.

Тэрбээр мөн “Рублиэр төлбөр тооцоо хийгээгүй тохиолдолд худалдан авагчдын алдаа гэж үзнэ. Бид буяны ажил хийх хүсэлгүй байна” гэж онцлов.

Орос улс Европын байгалийн хийн гуравны нэг орчмыг хангадаг. Тиймээс ОХУ-аас Украиныг эзлэн түрэмгийлсний эсрэг тавьсан барууны хориг арга хэмжээнд Путин байгалийн хийн төлбөрийн нөхцөлөөр хариу цохилт өгч байна.

Рублийн ханш хоёрдугаар сарын 24-нөөс хойш хүчтэй унасан боловч Путины зарлигийн дараа дахин сэргэж байна. Барууны хэд хэдэн компани  болон засгийн газар энэхүү шинэ зарлигыг евро эсвэл ам.доллараар худалдан авалт хийх гэрээний зарчмыг зөрчсөн гэж үзэж байна. Мөн Путины шинэ зарлиг Европыг эрчим хүчний хямралд оруулж болзошгүй юм.