Ардчилсан намаас өнөөдөр /2022.03.31/ Засгийн газрын сангуудыг шалгуулаx өргөдөл, урьдчилан xориx ангид хоригдож байгаа Э.Бат-Үүлийн хэвлэн нийтлэx эрxийг хассан талаарx АН-ын гомдлыг шалгаж буй процесс болон цаг үеийн бусад асуудлаар мэдээлэл хийлээ. 

"АТГ-ААР УЛС ТӨРИЙН ШОУ ХИЙХЭЭ БОЛЬ"

АН-ын Нарийн бичгийн дарга О.Баасанхүү:

-Нийгэмд олон асуудал өрнөж байгааг хүн бүхэн харж байна.  Заримыг нь харахад эрх баригчид өөрсдийн ашиг сонирхлын үүднээс дарах мэдээллийг ч хүргэж байгаа. Тухайлбал, ам.доллар 3150 төгрөгт хүрч ханшийн зөрүү маш их гарч байна. Экспорт зогсч, импорт гацсан энэ үед Засгийн газар юу ч хийхгүй хэвээр байна. Цаг үеийн асуудлаа шуурхай шийдвэрлэж чадахгүй байж санаатайгаар хөөн хэлэлцэх хугацаа нь дууссан Хөгжлийн банкны асуудлыг гаргаж тавилаа. Үнэхээр тэмцэж байгаа бол 2020, 2021 оны тайланг ил болгох хэрэгтэй. Түүнээс тайлангаа ил болгохгүй байж бүх бурууг АН руу чихэж болохгүй.

Мөн хууль бус сонгууль зохион байгуулж байгаа Х.Баттулга нэр төрөө цэвэрлэх хэрэгтэй. Хэрэв хэрэгт холбогдсон нь үнэн бол төрийн ажилд оролцохгүй байх нь зөв. Хууль бусаар сунгаа хийж байгааг намын гишүүдийг төөрөгдүүлж, хагалан бутаргах явдал гэж харж байна.

МАН ээлжит нэгэн тоглолтоо хийсэн. Тодруулбал, есөн гишүүнээ шалгуулна гэх инээдтэй мэдэгдэл хийж, иргэдийн анхаарлыг өөр тийш нь чиглүүлж байна. Ард түмэн ядуу байхад АТГ-аа улс төрийн шоуны нэг хэсэг болгохоо болих хэрэгтэй. Хоёрдугаарт, МАН мөрийн хөтөлбөртөө ипотекийн зээлийн урьдчилгааг Засгийн газраас төлж өгнө гэж амлалт өгсөн. Нийгмийн даатгал төлдөг бүх хүний ипотекийн зээлийг төлж өгнө гэсэн. Тэр амлалтаа санаж байгаа бол 2020 оны зургадугаар сараас хойш энэ нь хэрэгжсэнгүй гэдгийг сануулъя.

Хулгайч хулгайчийг барьж авав гэдэг шиг байхаа боль. Эрхзүйн тогтолцоон дээр  төрөөс хулгай хийхгүй байх тухай тусга. Хэн санаачилсан нь биш хэрэгжүүлж байгаа нь чухал. Тиймээс Засгийн газрын сангуудыг шалгуулаx өргөдөл өгч байна.

Э.Бат-Үүл даргын тухайд үзэл бодлоо илэрхийлэх хүний эрхийг зөрчиж байгаа асуудалд эмзэглэж байна. Үндсэн хуулиар заасан хүний эрхийг зөрчинө гэдэг хамгийн бүдүүлэг үйлдэл.

"САНГУУД ДЭЭР ХӨГЖЛИЙН БАНКНААС ДУТАХААРГҮЙ ӨНДӨР ЗЭЭЛ ОЛГОСНЫГ ШАЛГУУЛНА"

АН-ын бүлгийн хэвлэл мэдээлэл, олон нийттэй харилцах хэсгийн зөвлөхөөр Ц.Оюундарь:

-Намын байрны газартай холбоотой асуудал бүгд Хөгжлийн банктай холбоотой. С.Зоригийн хөшөөтэй байр бол Шинэ дэвшил холбоонд хамааралтай гэдгийг тодруулж хэлье. Харин сангууд дээр Хөгжлийн банкны зээлээс дутахгүй өндөр зээл олгосон байгааг шалгуулна. Энд эрх ашгийн маш том зөрчил бий гэж харж байна. Тухайлбал, Тариалан эрхлэх сан, ЖДҮ-г дэмжих сан зэргийг шалгуулах хүсэлт өгч байгаагаа албан ёсоор мэдэгдэж байна.