АНУ-д суугаа Монголын Элчин сайдын яамныхан ойрд тун завгүй байна. Америкийн Бүх хотоор явж монголчууддаа итгэмжлэх бичиг гэгчийг тарааж байгаа бөгөөд саяхан Чикаго хотод ажиллаад дараагийн хот руу мордсон талаар найз маань мэдээллээ. Тус улсад байгаа монголчууд уг бичгээ авч Монгол руу илгээснээр гэрийнхэн нь “Иргэн бүрт өгөх 1.5 сая”-ыг нь авах боломжтой болох аж. Тэр ч байтугай зарим нь уг итгэмжлэхийг олж ирэхээр АНУ-ыг зорьж байгаа гэнэ. Ар гэрийнхэн нь мөнөөх бичгийг тэсэн ядан хүлээж буй ч ердөө л хүн тус бүрт 70+10 мянган төгрөг шүү дээ. Сүүлийн арав нь сураг төдий байгаа. Гэхдээ л Монголдоо хэд хоногийн хоолны мөнгө болохоор сул орхиж болохгүй.

Үүнтэй зэрэгцэн нэгэн тэрсүүд бодол төрсөн нь тэнд байгаа иргэддээ сон­гуулиар амласан мөнгөө өгөх гэж л санасан, тэр ч байтугай бөөн зардал гаргаж Элчингийнхнийг дайчилсан гэдэгт эргэлзэхгүй байхын аргагүй. Үнэхээр Монгол гэдэг их айлын нэг хүүхэд нь яах аргагүй мөн гэж үзсэн бол сонгуулийн санал хураалтад ч тэднийг ийм маягаар оролцуулж дэлхийд тархсан иргэддээ хүндэтгэл үзүүлж болох байсан. Гэтэл иргэн бүрийн мөнгө олгоход нас харгалзахгүй, “монгол тол­гойтой” бүхэн мөнгө болж харагдсан учир ар гэрийнхний хүсэлтээр ийнхүү хүч тавьж ажиллаж байгаа бололтой.

Зөвхөн АНУ-д бус олон оронд Элчингийнхнийг ийн­­хүү дайчлах биз ээ. Үр дүнд нь Монгол Улсын иргэн хэ­дэн саяд ч хүрч мэднэ. Харин “Хүний хөгжлийн сан”-гаас уг мөнгийг олгохдоо хэчнээн иргэнтэйгээр тө­лөвлөсөн бол. Шинээр гэр бүл бологсод, хүүхдийн мөнгө зэрэг нь зохиомол гэр бүлийг олшруулж, тэнэмэл хүүхдүүдийг ээж, аавтай болгож буян үйлдсэн. Мөнгө олгохоо зогсоомогц гэр бүл салж, хуурамч аав ээжүүд хүүхдээ хөөж явуулсан га­жуудал үүсч байгаа. Тиймээс энэ удаа Монголын хүн ам огцом өсөх нь нэгэнт тодорхой болоод байна.

У.ОРГИЛМАА

Зохиогчийн эрх:
"Улс төрийн тойм" сонин