Засгийн газрын 2021 оны зургадугаар сарын 1-ний өдрийн хуралдаанаар нийслэлийн Сонгинохайрхан дүүргийн тавдугаар хороонд барьж буй дүүргийн Соёлын ордны барилгыг улсын Хүүхэд, залуучуудын театр болгохоор шийдвэрлэсэн. Соёлын яаман дээр улсын Хүүхэд залуучуудын театр гэдэг албан ёсны нэршлээ авчээ.

Шинэ театрыг энэ ондоо багтаж ашиглалтад оруулахаар төлөвлөөд байгаа аж. Улсын театр нь 850 хүний багтаамжтай бөгөөд 110 уран бүтээлч, ажилтан ажиллах гэнэ.

Театрт үйл ажиллагаагаа хэвийн явуулахад шаардагдах хөрөнгийг жил бүрийн Улсын төсөвт тусгахаар болсон байна. Хүүхэд, залуучуудын театрын барилга угсралтын ажлыг “Аглут” компани 2019 онд гүйцэтгэж эхэлсэн.

Энэ талаар Соёлын яамнаас тодруулахад “Одоогоор ажлын хэсэг гарсан ажиллаж байна. Орчин үеийн хүүхэд залуучуудын театр ямар чиг хандлагатай, дотор нь юу байх, ямар зохион байгуулалттай байх вэ зэрэг асуудлыг нь судалж байна” гэдэг хариултыг өгөв.

Соёлын яамны Урлаг, уран бүтээлийн бодлогын газрын дарга Б.Сэргэлэн:

-Сонгинохайрхан дүүргийн тавдугаар хороонд анх Соёлын ордон барих төсөл байсныг улсын Хүүхэд, залуучуудын театр болгохоор Засгийн газраас шийдвэрлэсэн. Барилгын хувьд ч том багтаамжтай. Шинэ Хүүхэд залуучуудын театр мэргэжлийн жүжгүүдийг тавьдаг, дэргэдээ студи, номын сантай, олон талт урлагийн үйл ажиллагаа явуулдаг байх болно. Урлагийг алслагдсан дүүргийн иргэдэд хүртээмжтэй болгох үүднээс Сонгинохайрхан дүүрэгт байгуулахаар болсон. Ихэнх театрууд хотын төвд байрладаг шүү дээ. Урлагийн боловсролоор нийгмийг гэрэлтүүлж, соёлын үйлчилгээ үзүүлэх зорилготой.

2022 оны улсын төсөвт Хүүхэд залуучуудын театрын тоног төхөөрөмж худалдан авахад таван тэрбум төгрөг тусгаснаас гурван тэрбумыг баталжээ.

Хүүхэд, залуучуудад зориулсан драмын театрыг 1951 онд "Хүүхдийн төв театр" нэртэйгээр 13 жүжигчний бүрэлдэхүүнтэй байгуулсан түүхтэй. 1967 онд “Хүүхэд, залуучуудын театр” болгон өргөжүүлж, 1991 оноос театрын удирдлагыг менежментийн гэрээний үндсэн дээр гүйцэтгүүлсэн. 1997 оноос төрд ногдох хувьцааг худалдах нөхцөлөөр найруулагч И.Нямгаваад хувьчилсан байна. Улмаар театрын үйл ажиллагаа зогсч, өдийг хүртэл хүүхэд, залуучуудад зориулсан мэргэжлийн уран бүтээл туурвих боломжгүй болсон.

Монголын жүжгийн урлагийн үе үеийн нэрт төлөөлөгчид болох олон гайхалтай уран бүтээлчид тус театрд ажиллаж байсан бөгөөд найруулагчдаар Ө.Эрэнцэнноров, С.Гэндэн, А.Цэрэндэндэв, Д.Лхасүрэн, С.Сугар зэрэг урлагийн гавъяатууд ажиллаж байжээ.

Мөн Ардын жүжигчин А.Очирбат, Төрийн шагналт Ц.Төмөрбаатар, МУГЖ Б.Батзаяа, Б.Туяа, И.Одончимэг, О.Энхтуул, Б.Энхтуяа, Л.Цэндсүрэн, С.Мандах, Ч.Авирмэд, Ц.Цэнд-Аюуш, Ж.Сүххуяг нарын 100 гаруй уран бүтээлч театрд бүтээлээ туурвиж, Мольерын “Шунал”, Шекспирийн “Ромео, Жульетта” гэх мэт олон гайхалтай дэлхийн сонгодог зохиолууд болон Монголын зохиолчдын шилмэл бүтээлүүдийг тайзнаа амилуулж байсан түүхтэй.